ЦЕГ: Зул, хүж асаахдаа үл шатах зүйл дээр байрлуулахыг анхааруулав

Баянгол дүүргийн зургадугаар хорооны нутаг дэвсгэрт байрлах байрны “Долдугаар давхарт газ дэлбэрч, гал гарсан байна” гэх дуудлага, мэдээлэл энэ сарын 23-ны өдрийн 05:46 минутад цагдаагийн байгууллагад бүртгэгджээ.

Дуудлага, мэдээллийг харьяа дүүргийн цагдаагийн газрын хоёрдугаар хэлтсээс шалгахад асаалттай байсан зулаас гал алдаж, улмаар өрөөний дулааны шугам хэт халалтын улмаас буудаж дэлбэрсэн байна. Үүнээс үүдэн доод давхрын айлын өрөөний тааз хэсэг цөмөрч, гадна зогсоолд байсан “Тоёота” маркийн хоёр тээврийн хэрэгсэл дээр хагарсан шил зэрэг эд зүйл унаж эвдрэл үүссэн хэргийг үргэлжлүүлэн шалгаж байгаа аж. Дээрх ослын улмаас хүний биед гэмтэл, бэртэл учраагүй байна.

Тиймээс иргэдийг зул, хүж өргөсөн бол эзэнгүй, хяналтгүй орхихгүй байж, болзошгүй эрсдэлээс урьдчилан сэргийлэхийг анхааруулсан юм. Мөн гэр, орон сууц, барилга байгууламжийн галын аюулгүй байдлыг хангаж, зул, хүж, арц асаахдаа үл шатах зүйл дээр байрлуулахыг ЦЕГ-аас анхаарууллаа.