3х3 | Монголын эмэгтэй, эрэгтэй шигшээ шөвгийн наймд шалгарлаа

3х3 сагсан бөмбөгийн Азийн АШТ Сингапурт үргэлжилж байна. Тус тэмцээнд өрсөлдөж буй Монголын эмэгтэй, эрэгтэй шигшээ баг хэсгээ тэргүүлж, шөвгийн наймд өрсөлдөх болзлоо хангалаа.

Тодруулбал, өчигдөр /2023.04.01/ Монголын эмэгтэйчүүдийн шигшээ хэсгийн сүүлийн тоглолтоо Малайзын эсрэг хийлээ.

Хожсон нь хэсгээс хоёроор шалгарч, хожигдсон нь хасагдах маш хариуцлагатай энэхүү тоглолтод манай охид 21:8-аар итгэл төгс ялалт байгуулж, шөвгийн наймд шалгарав.

Б.Ариунцэцэг 9 оноо, 6 самбар авч багаа тэргүүлсэн бол М.Цэрэнлхам 8 оноо, 6 самбар, О.Хулан 4 оноо авсан юм.

Өмнөх тоглолтод шагайгаа эвгүй гишгэн талбайг орхисон Ц.Болорцэцэгийн гэмтэл гайгүй байж тоглолтод оролцсон нь манай багийн хувьд сайн мэдээ байв.

Монголын шигшээ маргааш 13:45 цагаас шөвгийн наймд дэлхийн аварга, олимпын хүрэл медальт БНХАУ-ын хүчтэй багийн эсрэг тоглох болно.

Харин Монголын эрэгтэй шигшээ Сингапурыг 22:9-өөр итгэл төгс хожсоноор хэсгээ тэргүүлж, шөвгийн наймд өрсөлдөх болзлоо хангав.

Манай шигшээ тоглолтыг тун эрчтэй эхлүүлж, 13:0 гэсэн давамгайллыг бий болгосон. Улмаар энэ давуу талаа хадгалсаар ээлжит хожлоо байгуулав. Э.Дөлгөөн 7 оноогоор багаа тэргүүлсэн бол Д.Дэлгэрням 6 оноо, 8 самбар авсан юм. Мөн А.Ананд 5, О.Энхбаатар 4 оноо авч, багаараа тун жигд тоглолоо. Монголын шигшээ өнөөдөр шөвгийн 8-д Казахстаны эсрэг хүч сорих болно.