Хуулийнхны хүчийг сулруулах "ЖУНАЙ АЖИЛЛАГАА" эхэлжээ 

Өнгөрсөн долоо хоногийн баасан /2023.04.7/ гарагт Ерөнхий сайд Л.Оюун-Эрдэнэ чуулганы танхимд хэлсэн үгэндээ "Авлигачид биднийг өрөвдөөгүй, ирээдүйг хулгайлсан. Бид өрөвдөж болохгүй, уучилж болохгүй, ухарч болохгүй. Тэр Т.Бадамжунай яасан ч том бяртай юм. Яасан ч олон хүнээр нөлөөлүүлдэг юм. Улстөржиж болно, гэхдээ ийм зүйл дээр улстөржмөөргүй байна" хэмээн тодотгосон нь зүгээр ч нэг улстөрчийн үг, хийрхэл байсангүй. 

МАН-ын дарга, Ерөнхий сайдын шударга ёсны тэмцэл үргэлжилж байна. Тэрбээр нам харгалзахгүй авлигачид, төрөөс хумсалсан хулгайч нартай тэмцэнэ, тэдэнтэй эвлэрэхгүй гэдгээ мэдэгдсэн байдаг. 

Тэгвэл нөгөө талд манай хууль, хяналтын байгууллагынхан өдөр, шөнөгүй ажиллаж байна. Ялангуяа АТГ-ынхан. Өнөөдөр АТГ-ыг ямар бүтэц бүрэлдэхүүнтэй гэдгийг нь захын хүн мэднэ. Тус газрын мөрдөгчид хуруу дарам цөөн. Мөрдөн, шалгах ажил нь хэдэн зуу дахин их. Ачаалалтай ажиллана, дээр нь улс төрийн дарамт, сүрдүүлэгт автдаг гээд зовлон их. Гэвч өргөсөн тангарагтаа үнэнч зүтгэж яваа тэднийг энэ цаг үед улс төрийн гар хөл болсон мэтээр шүүмжилж, дэвслэх нь өрөөсгөл юм. 

АТГ-ынхан авлига, албан тушаалын гэмт хэргээс гадна олны анхааралд байгаа олон яллагдагчтай Хөгжлийн банкны хэрэг, нүүрсний хулгайтай тэмцэж байна. Дээр нь, авлига албан тушаалын гэмт хэрэгт шалгагдаж яллагдагчаар татагдсан, яллагдагчаар татагдаагүй байхдаа эх орноосоо зугтаж, хил давсан олон арван улстөрд нөлөө бүхий этгээдийг эх оронд нь авч ирэх ажлыг гүйцэтгэж байна.

Засгийн газраас тэднийг эх оронд нь авч ирж, гэм бурууг нь шүүхээр дэнслүүлэх үүднээс "Шувуу" ажиллагааг эхлүүлсэн. Энэ хүрээнд АТГ-ынхан авлигын Загалмайлсан эцэг гэгддэг Т.Бадамжунайг өнгөрсөн долоо хоногт эх оронд нь авч ирсэн билээ. Цаашлаад Ерөнхий сайд асан Ч.Сайханбилэг нарын 90 гаруй хүнийг авч ирэхээр ажиллаж, эхнээс нь ямар улсад орогнож байгаа зэргийг нь тогтоогоод эхэлчихсэн талаар эх сурвалж мэдээлж байна. 

Гэтэл Ерөнхй сайд Л.Оюун-Эрдэнийн хэлснээр авлигач, хулгайч нарыг эх оронд нь авч ирэх ажлыг сулруулах, олон нийтээр өрөвдүүлэх ажил өрнөөд эхэлсэн байна. Түүгээр ч зогсохгүй хууль, хяналтын байгууллагыг улстөрчдийн гар хөл мэтээр харлуулаад эхэлжээ. Үнэхээр авлигачид биднийг өрөвдөөгүй шиг, бид авлигачдыг өрөвдөх ёсгүй билээ. Үнэхээр л хуулийнхны хүчийг, Ерөнхий сайдыг шударга ёсны тэмцлийг сулруулах "Жунай ажиллагаа" эхлэх нь ч эхэлжээ.