Ж.Мөнхбат гурав хоногийн өмнө ирж, АТГ-т мэдүүлэг өгчээ

АТГ-аас Ж.Мөнхбатыг нүүрсний хулгайн хэрэгт холбогдуулан яллагдагчаар татан шалгаж байгаа билээ. Гэвч тэрбээр яллагдагчаар татагдан шалгагдаж байхдаа УИХ-ын гишүүний бүрэн эрхээрээ халхавч хийж Монгол Улсын хилийг орхин гарсан байдаг. Ингэхдээ БНСУ-д ээжийгээ эмчлүүлэхээр явсан гэдгээ мэдэгдсэн. Түүнийг эх орондоо байхгүй байхад нь УИХ-ын гишүүний бүрэн эрхээс нь өөрийнх нь хүсэлтээр чөлөөлсөн. 

Тэгвэл УИХ-ын гишүүн асан Ж.Мөнхбат эх орондоо иржээ. Тэрбээр өнөөдөр /2023.04.19/ АТГ-т байцаалт тайлбар өгсөн байна.

Энэ талаараа өөрийн цахим хуудаснаа "УИХ-ын гишүүнээс өөрийн хүсэлтээр чөлөөлөгдөж ямар нэгэн эрх дарх, хамгаалалтгүйгээр, Монгол Улсын жирийн иргэний хувиар АТГ-т очиж хуулийн дагуу тайлбар мэдүүлгээ өгөөд, иргэний үүргээ биелүүлээд явж байгаа. Намайг гадаад руу зугтаасан, оргон зайлсан гэх мэт гүтгэлэг их явсан. Шударга үнэн тогтоогдоно гэдэгт итгэлтэй байна. Ээжийгээ эмчлүүлж, аавыгаа сахиж байгаа хүндхэн үед хувь хүний өвчин зовлонгоор улс төр битгий хийгээсэй л гэж хүсэх юм даа" гэжээ. 

Харин ХЗДХ-ийн сайд Х.Нямбаатар түүний талаар  "УИХ-ын гишүүний бүрэн эрхийг нь түдгэлзүүлээд байгаа Ж.Мөнхбат Сөүл-Улаанбаатарын чиглэлийн нислэгээр гурав хоногийн өмнө эх орондоо ирсэн. Ээжийгээ гадаадад эмчлүүлнэ гэдгээ мөрдөх байгууллагадаа хэлээд явсан. Тэр хүрээндээ буцаж ирээд, хэргээ шалгуулж байгаа. "Шувуу" ажиллагааны талаарх дэлгэрэнгүй мэдээллийг АТГ-ын Дэд даргаар өгүүлнэ" гэсэн мэдээлэл өглөө.