Олон улсын наадмын шүүгчид Монголын дуучдын авьяасыг бишрэв

Оросын нэрт хөгжмийн зохиолч Исаак Дунаевскийн нэрэмжит Олон улсын дуулаачдын XII уралдаан Москва хотод зохион байгуулагдсан билээ.

Тус уралдаанд Монгол Улсаа төлөөлөн 10-36 насны 13 мэргэжлийн болон сонирхогч дуулаачид оролцож, финалын шатанд шалгарч, Тэргүүн байр, Гран при зэрэг олон шагналыг хүртсэн.

Монгол Улсаас ОХУ-д суугаа Элчин сайд Ө.Энхтүвшин болон ЭСЯ-ны хамт олон Монголын дуучдаа очиж дэмжсэн байна. Мөн Олон улсын дуулаачдын уралдаанд оролцсон Монголын дуулаачдын багийг Элчин сайдын яамандаа хүлээн авч, шагналт дуучид уран бүтээлийн дээжээсээ толилуулжээ.

Түүнчлэн ОХУ-ын театр, урлагийн сургуулийн багш нар, Олон улсын хөгжмийн төвийн удирдаач, продюсерууд, шүүгч нар Москва дахь Монголын ЭСЯ-нд болсон тоглолтод ирж, Монголын дуулаачдад баяр хүргэв.

Тэд монголчуудын авьяасыг биширч буйгаа илэрхийлээд “Цаашид монголчуудын авьяасыг олон улсад гаргах ажлыг зохион байгуулахаар төлөвлөж байна” гэжээ.