“Найрамдлын цом” тэмцээн Улаанбаатарт боллоо

Орос, Зөвлөлтийн боловсролын байгууллагуудын төгсөгчдийн дунд сагсан бөмбөг, дартсын тэмцээн болжээ. “Найрамдлын цом” тэмцээнд 25-аас дээш, 45-аас дээш гэсэн хоёр насны ангилалд нийт 22 баг, 200 гаруй тамирчин оролцсон байна. Удахгүй тохиох ОХУ-ын өдөрт зориулсан арга хэмжээг Зөвлөлт/Оросын их дээд сургууль төгсөгчдийн Монголын холбоо (МАВСУЗ) зохион байгуулав.

МАВСУЗ-ийн дэд ерөнхийлөгч Д.Цогзолмаа “Эрүүл биед саруул ухаан гэдэг хэлц үг бүх цаг үед л идэвхтэй хэвээр байна. Спорт бол хүмүүсийг үргэлж нэгтгэж, хамгийн хүчтэй нь ялах дүрэмтэй шударга тэмцэл. Оюутны амьдралд спорт бол ямар ч их сургууль төгсөгчдийн дурсамжийн хамгийн тод хуудсын нэг байдаг. Манай "Найрамдлын цом" бол энгийн нэг тэмцээн биш, уламжлалаа хүндэтгэж, олон жил үргэлжилсэн жинхэнэ нөхөрлөлийн бэлгэ тэмдэг юм” гэлээ.

ОХУ-аас Монгол Улсад суугаа Элчин сайдын яамны нэгдүгээр нарийн бичгийн дарга, Россотрудничество агентлагийн Монгол дахь төлөөлөгчийн газрын даргын үүрэг гүйцэтгэгч Валерия Килпякова “Та бүгд Орос, ЗХУ-ын их дээд сургууль төгссөн, хүн бүр мэргэжлээрээ амжилттай ажилладаг залуус учраас бид та нараар бахархдаг. Оюутны ширээний нөхөрлөл сургуулиа төгссөний дараа Монголд үргэлжилсээр байгаад нь баяртай бас урамтай сайхан байна” гэжээ.

Тэмцээнд оролцогчид Москва, Санкт-Петербург, Новосибирск, Эрхүү, Улаан-Үд, Ташкент болон бусад хотуудын дээд сургууль, их сургуулийг төгссөн төгсөгчид байлаа.

“Найрамдлын цом” тэмцээний хоёр өдрийн дүнгээр сагсан бөмбөгийн тэмцээний шигшээд "Найзууд" (Новосибирск, Москва, Тюмень хотын их дээд сургуулийн төгсөгчид) болон "Бабр" (Эрхүүгийн их дээд сургуулийн төгсөгчид) шигшээ багууд шалгарлаа.

Дартсын тэмцээнд 1-р байрыг Москвагийн Эрчим хүчний дээд сургууль (МПЭИ) төгсөгчдийн баг, 2-р байрыг Уралын баг (Эрхүү хотын их дээд сургуулийн төгсөгчид), 3-р байрыг “Бабр” баг (Эрхүү хотын их дээд сургуулийн төгсөгчид) тус тус эзэлжээ.