Загвар өмсөгч бүсгүй шууд дамжуулалтын үеэр амиа егүүтгэхийг завджээ

Өмнөд Солонгосын нэгэн загвар өмсөгч эмэгтэй шууд дамжуулалтын үеэр амиа хорлохыг завдсан үйлдэл шүтэн бишрэгчдийг нь шоконд оруулжээ. 

Зургаадугаар сарын 11-ний өдөр Им Жи Хе хэмээх загвар өмсөгч, стриймэр бүсгүй өөр хэд хэдэн стриймэрүүдтэй хамт согтууруулах ундаа хэрэглэж буйгаа шууд дамжуулжээ. Улмаар хамт байсан хэд хэдэн хүнтэй маргалдсан тэрээр бусад стриймэрүүдээ шүүмжилж, хамт хийсэн шууд дамжуулалтынхаа төлбөрийг төлөөгүй хэмээн буруутгаж эхэлсэн байна. 

Им Жи Хе гэртээ ирснийхээ дараа энэ явдалдаа үзэгчдээс уучлалт хүсэн, гэрээслэл бичиж эхэлжээ. Үүнийг анзаарсан шүтэн бишрэгчид нь албаныханд яаралтай мэдэгдснээр удалгүй гэрт нь яаралтай тусламжийн ажилтнууд ирж, тусламж үзүүлжээ. 

Түүний гарт хайч байсан ба биеийн байдал нь хэр байгаа тухай албан ёсны мэдээлэл цацагдаагүй байна. Нэгэн юүтүбэр Им Жи Хегийн зүрх хоёр удаа зогссон, одоогоор ухаан ороогүй байгаа хэмээн ярьсан ч энэ мэдээллийг албаныхан батлаагүй байгаа аж. 

Им Жи Хе 2006 оноос хойш загвар өмсөж эхэлжээ. 2013 оноос холимог тулааны тэмцээний үеэр зарлагч хийж эхэлсэн бөгөөд 2014 онд гэр бүл зохиож, хоёр хүүхэдтэй болсон ч удалгүй гэрлэлтээ цуцлуулжээ.