Х.Нямбаатар: Д.Мөнх-Эрдэнэ  миний ажлын өрөө, бурхан тахилыг минь хүртэл лайвдаж л байсан...

Консул асан Д.Мөнх-Эрдэнэ нарт холбогдох хэргийн давж заалдах шатны шүүх хурал энэ долоо хоногт болсон.

Шүүхийн шийдвэр гарсны дараа  Д.Мөнх-Эрдэнийн нэртэй пэйжээс Хууль зүйн сайдад хандан "Х.НЯМБААТАР аа ХУУЛЬ ЗҮЙН СААДАА минь албан тушаал мөнх биш шүү. Өнөөдөр чи хүчтэй байна! 

Монголын хууль, шүүхийн байгууллагыг ард иргэдийн эсрэг ашиглаж байгаа чинь гэмт хэрэг! Чиний хонгилын прокурор Ганхөлөг ажлаа сайн хийлээ!

Munkh-Erdene Даваагийн Мөнх-Эрдэнэ дүүгээс минь та нар айж үхлээ тэ? 

Сонгууль, улс төрөөс өөр юм бодохоо больсон новшнууд. Улс орныхоо байгаа царайг харчаач, үерийн муу усанд улс орон, ард иргэдийн амьдрал живж байна.

Нүүрсний хулгайчдаа хориод ялыг нь өгөөч! Боловсролын зээлийн сан, бусад сангийн хулгайчуудаа яллаач! 

Та нар амруугаа мөнгө чихүүлчээд яаж чадахгүй байгаа тийм үү!" хэмээн бичжээ. 
 
Харин Х.Нямбаатар "Хууль зүйн сайд шүүхийн шийдвэрт нөлөөлөх ямар ч боломжгүй. Бусдын нэгэн адил шударгаар шийдэгдээсэй хэмээн хүлээж байсан. Муу л бол нөгөө хар овоохой гэгчээр хууль зүйн сайд л шүүмжлэлийн бай болдог нь жам юм. Д.Мөнх-Эрдэнийн хувьд миний ажлын өрөө, бурхан тахилыг минь хүртэл лайвдаж л байсан. Би түүний дэмжигч фэн нь гэх нь юу юм, гэхдээ түүний үндсэн хуулиар олгогдсон үг хэлэх, үзэл бодлоо илэрхийлэх эрхийг ямагт хүндэтгэж ирсэн" гэсэн байна.

Тодотгоход,  Анхан шатны шүүх : Д.Мөнх Эрдэнэд 

1. Эрх мэдэл албан тушаалын байдлаа урвуулан ашигласан хэрэгт нийтийн албанд томилогдох эрхийг 3 жилээр хасаж, 2  жил, 6  сарын хорих ,

2. Худал мэдээлэл тараах хэрэгт  1000.000 төгрөгөөр торгох,

3.Хууль сахиулагчийг эсэргүүцсэн хэрэгт  2.700.000  төгрөгөөр торгох ял 

4. Хахуул өгөх хэрэгт нийтийн албанд томилогдох эрхийг 2   жилээр хасаж, 1  жил, 4 сарын хугацаагаар хорих ял оноосон. 

Тэгвэл Давж заалдах шатны шүүх хэргийг хянан хэлэлцээд:

Шүүгдэгч Д.Мөнх Эрдэнийн 

1. Эрх мэдэл албан тушаалын байдлаа урвуулан ашиглаж улсын төсвийн хөрөнгөд их хэмжээний хохирол учруулсан гэмт үйлдлүүдээс Дипломат төлөөлөгчийн газрын ажилтан, тэдгээрийн гэр бүлийн гишүүдэд эх орондоо ирж амрахтай холбогдсон зардлыг  илүү олгож, өөртөө болон бусдад давуу байдал бий болгосон гэх нэг үйлдэл холбогдлыг нь хэрэгсэхгүй болгож, гэмт  хэргийн улмаас учруулсан хохирлоо нөхөн төлснийг харгалзан үзэж, нийтийн албанд томилогдох эрхийг 2 жилээр хасаж, 1  жил, 10 сарын хугацаагаар хорих ял,

2. Бусдад албан тушаалын байдалтай нь холбогдуулан Хахуул өгөх хэрэгт нь нийтийн албанд томилогдох эрхийг 2 жилээр хасаж, 1 жил 4 сарын хорих ял оногдуулсныг хөнгөрүүлэн өөрчилж, нийтийн албанд томилогдох эрхийг 2  жилээр хасаж, 8.000.000 төгрөгөөр торгох ял оногдуулан, бусдын нэр төр, алдар хүндэд халдсан илт худал мэдээллийг олон нийтэд тараасан, хууль сахиулагчийг албан үүргээ биелүүлэхтэй нь холбогдуулан хүч хэрэглэж эсэргүүцсэн гэмт хэрэг оногдуулсан торгох ялыг хэвээр үлдээж шийдвэрлээд байна.