Уимблдоны финалыг Брэд Питт, Даниел Крейг нар үзэж, одод чуулав

Талбайн теннисний Их дуулгын цуврал дөрвөн тэмцээн дотроосоо хамгийн эртний мөн хамгийн алдартай Уимблдоны эрэгтэйчүүдийн ганцаарчилсан төрлийн финалд Сербийн Новак Жокович, Испанийн Карлос Алькарас нар халз туллаа.
 

Хөгшрөшгүй мөнхийн хутаг оршсон мэт доод үеийнхээ залуусыг дээш гаргахгүй дарсаар, хожсоор яваа 36 настай Новак Жоковичийн хувьд энэ финалд хожвол Рожер Федерерийн Уимблдонд 8 удаа түрүүлсэн дээд амжилтыг давтах байв. Харин 20 настай Карлос Алькарас домогт теннисчинтэй төв талбайд, оддын нүдний өмнө тулахынхаа өмнө “Одоо бол айж, биеэ барьдаг цаг биш ээ” гэж хэлсэн юм. Хэдийгээр Жокович хүсэл тэмүүлэл, хашир туршлага, ур чадвараараа дараа дараачийн үеэ буулган авсаар байгаа ч гэлээ үеийнхнээсээ арай илүү төрчихсөн, сэтгэлзүй ч их сайтай Алькарасыг энэ удаад барсангүй.

1:6, 7:6, 6:1, 3:6, 6:4-аар испани залуу хоёр дахь Их дуулгадаа түрүүллээ. Теннис сонирхогчдын хувьд энэ тоглолт сонирхолтой, үзүүштэй байснаас гадна шоу-бизнесийн олон томчууд цугласнаараа  оддын бөөгнөрлийг үүсгэв.

Apex киноныхоо зураг авалтыг хийхээр Их Британид ирээд буй Брэд Питт, найруулагч Гай Ричитэй хамтдаа ирж, зэрэгцэн суулаа. 23 жилийн өмнө Snatch кинонд хамтран ажилласан хоёр эр энэ удаад тоглолтын үеэр нүд нь гэрэлтэн ярилцаж үзэгдсэн.

Мөн Жеймс Бонд буюу Даниел Крейг эхнэр, жүжигчин Рейчел Вайсын хамт ирж тухалжээ. Танилцаад 30 гаруй жил, гэрлээд 12 жил болж буй гэр бүлийн хоёр цугтаа явах дуртай байдаг.

Америкийн дуучин бүсгүй Ариана Гранде саарал даашинзтай морилон ирж, Их Британийн жүжигчин залуус болох Жонатан Бэйли, Эндрю Гарфилд нарын дунд байраа эзлэв.

Эмма Уотсон бол Уимблдоныг алгасалгүй үздэг нэгэн. Эмэгтэйчүүдийн финалыг өчигдөр сонирхсон бол энэ удаад эрчүүдийн финалыг ах Алекстайгаа хамт үзэхээр иржээ.

Загвар өмсөгч, блогчин Поппи Делевинь, жүжигчин бүсгүй Лили Жеймс, рэппер Stormzy, жүжигчин Шүти Гатва, Идрис Елба, Эмили Атак, Жеймс Нортон, Лора Уитмор, 84 настай Иэн Маккеллен дуучин Элла мөн жүжигчин Хью Жекмэн эхнэр Деборра-Лигийн хамт теннис сонирхон үзлээ. Мөн Уэльсийн гүнж Кейт Миддлтон, хунтайж Уильям нар хүүхдүүдийнхээ хамт үзэж сонирхсон юм.