Уснаас айх эмгэгтэй ч дүрийнхээ төлөө 12 цаг усанд байсан жүжигчин Ём Хе Ран

"Netflix"-ийн шилдэг цувралуудын нэг "Mask Girl" кинонд дүр бүтээсэн жүжигчин Ём Хе Ран уснаас айх эмгэгтэй ч дүрээ бүтээхийн тулд 12 цагийн турш усан дотор байсан тухайгаа саяхан өгсөн ярилцлагадаа дурджээ. 

Ём Хе Ран уг кинонд "Mаsk Girl"-ийн гарт амиа алдсан хүүгийнхээ өшөөг авахын тулд тэмцэж буй Ким Кён Жагийн дүрийг бүтээсэн. Сүмийн итгэгчээс хүүгийнхээ өшөөг авахын тулд юу ч хийхээс буцахгүй эмэгтэй болж хувирсан тэрээр "Ким Кён Жагийн дүрийг бүтээхийн тулд тусгай нүүр хувиргалт хийлгэх шаардлагатай болсон. Нүүр хувиргалт хоёр цагийн турш маш их өвдөлттэй үргэлжилсэн ч энэ нь дүрээ бүтээхэд их тус болсон. Кинон дээр Ким Кён Жа машинтайгаа усанд живдэг хэсэг гардаг. Би уснаас айх эмгэгтэй учир бусдын тусламжгүйгээр энэ дүрд тоглох боломжгүй гэдгээ найруулагчид анх хэлсэн.

Кино зураг авалт эхлэхээс өмнө би чөлөөт шумбалтын дасгал хийж, энэ нь хангалтгүй санагдсан учраас нэг метрийн гүнтэй хүүхдийн усан санд толгойгоо дүрж дасгал хийсэн. Хүмүүс намайг юу хийж байгаа юм бол гэж их гайхсан байх. Продюсерийн багийнхан надад маш их тусалсан. Тэд зураг авалтын явцад надад машины хаалга онгойлгоход тусалж, шаардлагатай үед уснаас хэрхэн гарах тухай заавар өгч байсан. 

Кинон дээр усан доторх үзэгдэл ердөө хэдхэн секунд л үргэлжилдэг ч би бараг 12 цагийг усан дотор өнгөрөөсөн. Ажилтнууд миний байдлыг сайн мэдэж байсан учраас сэтгэл нь хөдөлж, найруулагч маань уйлах шахсан. Тиймээс намайг үүнийг даван гарсанд талархал илэрхийлэн баяр хүргэсэн" гэжээ. 

(Aquaphobia- Уснаас айх айдсын эмгэг. Энэ төрлийн эмгэгтэй хүмүүс усыг харах, мөн бодох төдийд маш их айдас мэдэрдэг. Тэд усанд орох, шүршүүрт орох, ундны усны нөөц, их хэмжээний ус, усан сан харах, төсөөлөх үедээ айдас мэдрэх нь элбэг байна) 

Жүжигчин Ём Хе Ран анх 2003 онд найруулагч Бун Жүн Хугийн бүтээл "Алуурчны дурсамж" кинонд дүр бүтээж байжээ. Үүнээс хойш алдартай хэд хэдэн кинонд дүр бүтээсэн тэрээр "Mask Girl" кинонд бүтээсэн дүрээрээ мэргэжлийн ур чадвараа бүрэн дүүрэн харуулсан учир уг энэ жил шилдэг жүжигчний шагнал хүртэж магадгүй хэмээн кино шүүмжлэгчид таамаглаж байна.