Балетчин Ө.Мөнхжин АНУ-ын "Atlanta Ballet"-ыг сонгожээ

Дэлхийн тэргүүлэх зэргийн "Atlanta Ballet" компанид балетчин Ө.Мөнхжин нэгджээ.

Дэлхийн өнцөг булан бүрээс ирсэн шилдэг балетчидтай мөр зэрэгцэн ажиллах болсон тэрээр уран сайхны удирдаач Геннади Недвигиний төсөөллийг бодит болгох аяллаа ийнхүү эхлүүлжээ. 

Тус компанийн албан ёсны фэйсбүүкт "Өлзийжаргалын Мөнхжин нь ДБЭТ-д гоцлол бүжигчнээр ажиллаж байсан, энэ жил АНУ-ын олон улсын балетын тэмцээнээс Роберт Жоффригийн нэрэмжит шагнал хүртэж, Монголын оны шилдэг бүжигчнээр тодорсон. Тэрээр 2019 онд зохиогдсон Орос, Япон, Евразийн балетын 1-р уралдааны мөнгөн медаль, 2022 оны Солонгосын олон улсын балетын уралдаанаас алтан медаль хүртэж байсан нэгэн" хэмээн танилцуулсан байна. 

Дэлхийн шилдгүүдийн эгнээнд авьяас чадвараараа багтаж чадсан тэрээр 2010-2018 онд ОХУ-ын Пермь хотын Сонгодог бүжгийн сургуулийг балетын жүжигчин мэргэжлээр суралцаж төгсөөд 2018 оноос Дуурь бүжгийн эрдмийн театрт балетын жүжигчнээр ажиллаж эхэлжээ. 

2017 онд БНХАУ-ын Бээжин хот “IBCC 2017” тэмцээнээс тусгай байр эзэлсэн тэрээр "Мөнгөн мод 2022" наадмаас "Шилдэг бүжигчин" шагнал хүртсэн. ДБЭТ-ын тайзнаа тоглогдсон П.И.Чайковскийн "Щелкунчик", "Хунт нуур", А.Аданы "Жизель", И.Морозовын "Амттаны доктор" зэрэг сор болсон бүтээлүүдэд тоглосон тэрээр ийнхүү дэлхийн тайзнаа авьяас чадвараа гайхуулах нь ээ.