NETFLIX | Монголд зураг авалтаа хийсэн "Хүчирхэг охин Нам Сүн" кино цацагдлаа

Netflix-ээр энэ сарын 7-ний өдрөөс эхлэн Монгол Улсад зураг авалтаа хийсэн "Strong girl Namsoon" олон ангит кино цацагдаж эхэлжээ. JTBC телевизийн бүтээл энэхүү кино багадаа аавтайгаа Монголд аялалаар ирсэн бяцхан охин ааваасаа төөрч Монголд үлдэж байгаа тухай зураглалаар эхэлнэ.

Малчин гэр бүлийн гишүүд охиныг олж өөрсдийн охин мэт өсгөх бөгөөд бяцхан охин хэмжээлшгүй их хүч чадлыг өвлөн төржээ. Охиноо алдсан ээж Солонгост хүчирхэг хүмүүсийн дунд тэмцээн зохион байгуулна. Харин Нам Сүн охин Ганнам стайл дууг сонссоноор өөрийгөө Солонгос хүн гэдгээ санаж, улмаар Солонгос руу буцахаар шийднэ.

Энэ хооронд Нам Сүн охины байр суурийг эзлэхээр санаархсан эмэгтэй ээжид нь өөрийнх нь охин хэмээн итгүүлэх бөгөөд Нам Сүний сууж явсан онгоц сүйрэхийн даваан дээр Нам Сүн гайхалтай авьяас чадвараараа онгоцон дахь хүмүүсийг аварснаар үйл явдал цааш өрнөнө. 

Энэхүү кинонд найруулагч Б.Сумъясүрэн найруулагчаар ажилласан бөгөөд тус кино түүний оролцсон зургаа дахь кино төсөл ажээ. Түүний найруулж буй "Өрнөдийг зорих замд" УСК-ний зураг авалт мөн Монгол Улсад хийгдэж байгаа бөгөөд уг киног Hulegu Pictures болон Солонгосын Kortop Media хамтран бүтээж байгаа аж.