Мэттью Перригийн гэрээс жороор олгодог эм олджээ

Дэлхий дахинаа алдаршсан "Friends" киноны од Мэттью Перри орон нутгийн цагаар өнгөрсөн бямба гарагт Лос Анжелес дахь гэртээ живж нас барсан байдалтай олджээ. 

54 насандаа ийнхүү харамсалтайгаар таалал төгссөн тэрээр олон жилийн турш мансууруулах бодис хэтрүүлэн хэрэглэж, сүүлийн хэдэн жилийн турш үүнийхээ эсрэг тэмцэж байсан билээ. "Friends" цувралын жүжигчид Мэттью Перригийн үхэлд ямар нэгэн гаднын нөлөө байгаа эсэх тал дээр сайтар шалгаж өгөхийг эрх баригчдаас хүсжээ.

Цагдаа нар урьдчилсан байдлаар түүнийг гаднын нөлөөгүй нас барсан хэмээх дүгнэлт гаргаад байгаа бөгөөд гэрээс нь ямар нэгэн хууль бус хар тамхи олдоогүй ч жороор олгодог хэд хэдэн эм илэрчээ. Түүний гэрээс сэтгэл гутралын эсрэг эм, айдас түгшүүрийн эмгэгийн үед уудаг эм болон гуурсан хоолойн багтраа өвчний үед хэрэглэдэг цацлага зэрэг олджээ. 

"Friends" цуврал 1994-2004 он хүртэл нийт 10 бүлэг үзэгчдийн хүртээл болсон. Киноны гол дүрийн жүжигчид бүгд дэлхий дахинаа алдартай болж, олон арван жилийн нөхөрлөлийг бий болгож чадсан юм. Мэттью Перри жүжигчин Женнифер Энистонтой хамгийн дотно нөхөрлөдөг байсан бөгөөд хамгийн хүнд хэцүү үеүүдэд нь Энистон сэтгэл санаагаар дэмжиж, тусламж үзүүлдэг байжээ.