ШҮҮХ ХУРАЛ: Т.Бадамжунайг шүүх хурал завсарлаж, шүүгчид зөвлөлдөж байна

УИХ-ын гишүүн асан Т.Бадамжунай нарын дөрвөн хүнд холбогдох хэргийн шүүх хурлын урьдчилсан хэлэлцүүлэг өнөөдөр /2023.11.04/ Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны шүүхэд 10:00 цагт эхэлсэн. Хурал өмгөөлөгчдийн тавьсан санал, прокурорын зөвшөөрлөөр хаалттай үргэлжилж, дөнгөж сая завсарлалаа.

Шүүгдэгч Т.Бадамжунай шүүх хурлын урьдчилсан хэлэлцүүлэгтээ тэргэнцэртэй ирсэн бөгөөд хүний хэлж ярьж байгааг ойлгож байгаа ч өөрөө сайн ярьж чадахгүй гэдгээ шүүх хурлын үеэр өмгөөлөгчөөрөө дамжуулж уламжилсан байдаг. 

Тодруулбал, шүүх хурлын урьдчилсан хэлэлцүүлэг дөнгөж эхлэх үед шүүгдэгч Т.Бадамжунайгаас шүүгч ийнхүү асуусан билээ. 

Шүүгч: Т.Бадамжунай танд ирцтэй холбоотой санал байна уу. Үг хэлж, ярьж чадах уу?

Шүүгдэгч Т.Бадамжунай: /Толгой сэгсрэв/

Шүүгч: Ярихгүй юу, тэгвэл яаж хүсэл зоригоо илэрхийлэх вэ?

Шүүгдэгч Т.Бадамжунай: ...

Шүүгч: Хэлсэн ярьсан зүйл ойлгож байна уу?

Шүүгдэгч Т.Бадамжунай: /Толгой дохив/

Шүүгч: Нэг өмгөөлөгч тань шүүх хуралдаа оролцож чадахгүй гэдэг үндэслэлээ тодорхой тайлбарлаж, бичиг ирүүлсэн байна. Шүүх хурлыг цаашаа үргэлжлүүлж, асуудлыг хэлэлцээд явахад танд татгалзах зүйл байна уу. 

Шүүгдэгч Т.Бадамжунай: /Толгой сэгсрэв/

Шүүгч: Байхгүй юу, үг хэлж чадахгүй байгаад байна уу, тээ. 

Өмгөөлөгч: Муу ярьж байгаа... гэсэн юм. 

Тэгвэл шүүх хурлын урьдчилсан хэлэлцүүлэг зургаан цаг орчим үргэлжилж, дөнгөж сая завсарлалаа. Одоогоор шүүх бүрэлдэхүүн шийдвэрээ гаргахаар зөвлөлдөж байна. Шийдвэрийг эргэн мэдээлэх болно.