Монголын байгалийн шилдэг ГЭРЭЛ ЗУРГИЙН ҮЗЭСГЭЛЭН өнөөдөр гарна

Монголын байгалийн гэрэл зурагчдын нийгэмлэгээс Монголын шилдэгийн шилдэг байгалийн гэрэл зургийн олон улсын уралдааныг Монгол Улсын Ерөнхийлөгчийн ивээл дор энэ жил хоёр дахь удаагаа уламжлал болгон зарласан билээ. Тус уралдаанд зөвхөн Монголын төдийгүй олон улсын гэрэл зурагчид оролцоход нээлттэй байсан бөгөөд нийт 14 улс орны 110 гэрэл зурагчны 638 бүтээл уралдаанд ирсэн бөгөөд 2022 оны арваннэгдүгээр сарын 3-нд шүүгчдийн дүнг нэгтгэн дөрвөн төрөл тус бүрд шилдэгүүдийг шалгарууллаа. Өмнөх жилтэй харьцуулахад энэ жил гадаад орноос оролцож буй хүмүүсийн тоо нэмэгдсэн байна.

Тус уралдаан нь Монгол Улсад зохион байгуулагдаж байгаа олон улсын хэмжээний уралдаан бөгөөд Олон улсын чанартай уралдааныг эх орондоо зохион байгуулснаараа Монгол Улсыг зорих гадаадын гэрэл зурагчдын тоог нэмэгдүүлэх, дотоодын зурагчдын бүтээлийг олон улсад сурталчлан таниулах, Монгол Улсад аялал жуулчлалын урсгалыг татах, байгалийн үзэсгэлэн болон ахуй соёлын онцлогоо бусдад таниулах зэрэг олон талын ач холбогдолтой. Тийм учраас бид шилдэг гэрэл зургийн уралдааныг жил бүр уламжлал болгон зохион байгуулах төлөвлөгөөтэй ажиллаж байна.

Уралдаанд ирсэн бүтээлүүд бүгд өөр өөрийн онцлог бүхий Монгол орны гоо үзэсгэлэнг тал талаас нь харуулсан бүтээлүүд байсан бөгөөд дэлхийн хэмжээнд Монгол Улсыг таниулах ажилд үнэтэй хувь нэмэр болно гэдэгт зохион байгуулагчид итгэлтэй байна. Шалгаруулалтын тухайд шүүгчдийн нэгтгэсэн дундаж үнэлгээн дээр үндэслэн шүүгчид хуралдаж шилдэгүүдийг шалгаруулжээ.

2023 оны шилдэгийн шилдэг зургаар Гончиг овогтой Ган-Өлзийгийн “Адуучин” зураг шалгарсан юм.

ҮЗЭСГЭЛЭНТ БАЙГАЛЬ ТӨРӨЛД

• Тэргүүн байранд, Ж.Амартүвшин “Эрин зууны үргэлжлэл”

• Хоёрдугаар байранд, Б.Баяр “Элсэн далайг гатлах адуун сүрэг”

• Гуравдугаар байранд, С.Нацагдорж “Болжморын жиргээ”

МОНГОЛ АХУЙ ТӨРӨЛД

• Тэргүүн байранд, Жатенипат ЖКБой Кетпрадит “Цамын өмнө”

• Хоёрдугаар байранд, Э.Батхүү “Сарны хатираа”

• Гуравдугаар байранд, Э.Мөнхчулуун “Баатар”

ЗЭРЛЭГ БАЙГАЛЬ ТӨРӨЛД

• Тэргүүн байранд Т.Ерөөлт “Ялалтын агшин”

• Хоёрдугаар байранд, Ц.Өлзий “Унтаж буй гоо үзэсгэлэн”

• Гуравдугаар байранд, Д.Цэвээнравдан “Довтлохын өмнө”

АГААРЫН ГЭРЭЛ ЗУРАГ ТӨРӨЛД

• Тэргүүн байранд Б.Эрдэнэбулган “Аниргүй”

• Хоёрдугаар байранд, С.Мөнхбаатар “Хүнгүйн гол”

• Гуравдугаар байранд, Д.Баттулга “Хязгааргүй” гэсэн бүтээлүүд тус тус шалгарсан байна.

Урд өмнө нь зохион байгуулагдаж байсан уралдаануудаас хэд хэдэн зүйлээрээ онцлогтой.

• Уралдааны зураг хүлээн авах хугацааг маш уртаар буюу 8 сарын хугацаа өгсөн. Өөрөөр хэлбэл уралдааныг 2023 оны 3-р сард зарлаж 10-р сар хүртэлх хугацаанд бүтээл хүлээн авсан нь гэрэл зурагчид уралдаанд зориулан бүтээлээ бэлтгэх боломжийг олгож, цаашдаа өөрийгөө хөгжүүлэх, өрсөлдөөний орчин бүрдүүлэх зэргээр гэрэл зургийн хөгжилд хувь нэмэр оруулж байна.

• Монголын болон олон улсын шүүгчид хамтарч ажилласан. Тус уралдааныг олон улсын хэмжээний нэр хүндтэй гэрэл зурагчид, судлаачид болох Дан Буркхолдер, Даниель Кордан, Г.Октябрь, Г.Бадамсамбуу, Макс Мюнх, Пауль Зизка болон Ронан Донаван зэрэг шүүгчид гэрэл зурагчны нэрийг нууцалсан тусгайлсан код бүхий зурагнуудад оноо өгч, тэдгээрийн онооны нийлбэрийг гаргаж, хамгийн өндөр оноотой зурагнууд дээр хэлэлцүүлэг, шүүмж өрнүүлсэн. Шилдэгийн шилдэг 1 зураг, төрөл тус бүр дээр 3 байр, 1 тусгай байрын шагнал гээд нийт 14 зургийг онооны эрэмбэ, шүүгчдийн шүүмж, хэлэлцүүлгээр шалгаруулсан юм.

• Залуу гэрэл зурагчдыг дэмжих хүрээнд 25 болон түүнээс доош насны гэрэл зурагчид уралдаанд бүтээлээ ямар нэгэн хураамжгүйгээр явуулах боломжийг олгосон нь залуу гэрэл зурагчдад өрсөлдөх боломжийг бий болгосон шинэ санаачлага байлаа.

• Уралдааны бас нэг зорилго нь гэрэл зургийн үнэлэмжийг дээшлүүлэх бөгөөд уралдаанд ирсэн бүтээлүүдийн оюуны өмч нь гэрэл зурагчдадаа үлдэж байгаа гэдгээрээ онцлогтой. Үүгээрээ бид оюуны өмчийг дээдлэх, гэрэл зурагчны бүтээлийн үнэлэмжийг дээшлүүлэхийг бусдад уриалж байна гэж ойлгож болно.

• Гэрэл зургийг хүлээн авахдаа веб дээр суурилсан системээр хүлээн авсан нь гэрэл зургийн уралдааны зураг хүлээн авах системийг шинэчилж ойлгомжтой болгосон бас нэг ахиц, оролдлого байсан юм. Цаашдаа бидэнд засаж сайжруулах зүйлс байгааг ч олж харлаа.

• Уралдаанд шалгарсан гэрэл зургийн шилдэг бүтээлүүдээр тусгай үзэсгэлэн, каталог гаргаж олон улсын түвшинд сурталчилах ажлыг хийхээр мөн төлөвлөж байгааг дуулгахад баяртай байна.

Зохион байгуулагчдын зүгээс тус уралдаанд шалгарсан шилдэг бүтээлүүд тухайн жилдээ Монгол Улсыг сурталчилах онцгой сурталчилгааны бүтээл болно гэдэгт итгэлтэй байгаа юм. Уралдааны шилдэг бүтээлүүдийн үзэсгэлэн "Блю Мон Таур"-т байрлах Норфей Арт Галлерейд 2023 оны арваннэгдүгээр сарын 10-нд 18.00 цагт нээлтээ хийх бөгөөд нэг сарын турш олон нийтэд дэлгэн үзүүлнэ.

Тиймээс та бүхнийг Монголын байгалийн гэрэл зургийн уралдааны шилдэг бүтээлүүдийг хүрэлцэн ирж үзэхийг урьж байна.

Та бүхэн уралдааны шилдэг бүтээлүүдтэй танилцахыг хүсвэл www.mlps.mn болон Mongolian Landscape Photographers Society Facebook пейжээр шилдэг зургуудийн талаарх мэдээллийг дэлхийн хаанаас ч авах боломжтой.

Дашрамд Монголын байгалийн гэрэл зурагчдын нийгэмлэг нь Монгол орныхоо байгалийн үзэсгэлэнг таниулах чиглэлээр үйл ажиллагаа явуулдаг бөгөөд 2023 оны тавдугаар сард “Монгол орон бидний дуранд” үзэсгэлэнгээ Австрали улсад гаргасан бөгөөд 11-р сард Америкийн Нэгдсэн улсын Вашингтон хотод нийгэмлэгийн гишүүдийн хамтарсан үзэсгэлэнг гаргахаар бэлтгэж байна.