Г.Батзаяа: Бөхчүүдээс ₮5 сая авч барилдах эрхийг сэргээж байна гэдэг нь ташаа мэдээлэл

Монголын олон улсын ба үндэсний спортын арбитраас мэдээлэл хийлээ.

(2024.02.23)

Монголын Олон улсын ба үндэсний спортын арбитрын Ерөнхийлөгч Г.Батзаяа "Спортын арбитрын гаргаж байгаа шийдвэр нь шүүхийн шийдвэрийн нэгэн адил хэрэгжинэ, заавал биелэгдэх шинжтэй. Хэрвээ спортын арбитрын шийдвэр гадаад улсад гүйцэтгэхээр болбол гадаадын арбитрын шийдвэрийг хүлээн зөвшөөрч, биелүүлэх тухай олон улсын конвенцод Монгол Улс нэгдэж орсон байдаг. Тэгэхээр Үндэсний спортын арбитрын шийдвэр нь дэлхийн 190 гаруй улсад шууд хэрэгждэг нөхцөлтэй.

Допингийн маргааны шийдвэрийг давжзаалдах шугамаар гаргаж байгаа учраас эцсийн шийдвэр гаргадаг. Эцсийн шийдвэрийн хувьд аль нэг тал нь гомдолтой, хүлээн зөвшөөрөхгүй байвал Швейцарын Лозонд байдаг Олон улсын спортын арбитрын шүүх рүү гомдол гаргаж хянуулдаг." гэлээ.

Тэрээр үргэлжлүүлэн "Зарим мэдээллийн хэрэгслээр 5 сая төгрөг авч бөхчүүдийн барилдах эрхийг сэргээж байна гэдэг ташаа мэдээлэл явж байна. Жишээ нь иргэн шүүхэд гомдол гаргахад улсын тэмдэгтийн хураамж төлдөг. Түүнтэй адилтган 5 сая төгрөг нь гомдол гаргахдаа бүрдүүлж өгч байгаа материалын хураамжийн төлбөр байдаг. Энэ төлбөрийг авч байж допингийн болон арбитрын маргаанууд үүсдэг дэгтэй. Энэ нь арбитраас юм уу допингоос хэрэг хянан шийдвэрлэх ажиллагааны явцад авдаг мөнгө биш." гэв.

Мөн Спортын арбитр дээр 2017 оноос хойш дараах хэргүүдийг шийдвэрлэжээ. Үүнд:

- Монголын тэшүүрийн холбооны холбогдох хүмүүсээс гаргасан хэргийг шийдвэрлэсэн.

- Допингийн үндэсний төвийн нэхэмжлэлтэй гаргасан тамирчинтай холбоотой хэргийг шийдвэрлэсэн.

- Монголын цанын холбоотой хамааралтай хэргийг шийдвэрлэсэн.

- Хөлбөмбөгийн холбоотой хамааралтай маргаануудыг шийдвэрлэсэн.

- Үндэсийн бөхийн тамирчин Э.Оюунболдтой холбоотой хэргийг шийдвэрлэсэн.

- Монголын морин спорт уяачдын холбоотой буюу хурдан морины төрлийн маргаануудыг шийдвэрлэж байсан.

- Үндэсний бөхийн тамирчид болох Б.Өсөхбаяр, Ц.Мөнхбаяр хоёрын хэргийг шийдвэрлэсэн.

Одоо давжзаалдах комисс дээр үр дүнгийн удирдлага явуулж байгаа буюу хэргийн маргаан таслах ажиллагаа явагдаж байгаа хоёр маргаан байгаа аж.

М.Бадарчийн нэхэмжлэлтэй Монголын үндэсний баяр наадам зохион байгуулах хороо, Үндэсний их баяр наадмын үндэсний бөхийн салбар хороо, Монголын үндэсний допингийн эсрэг байгууллага гэсэн гурван байгуулллагатай холбоотой допингийн асуудлын хэрэг хянан шийдвэрлэх ажиллагаа явагдаж байна.

Дараагийнх нь үндэсний бөхийн тамирчин Т.Бэгзсүрэнгийн өргөдөлтэй Монголын үндэсний баяр наадам зохион байгуулах хороо, Монголын үндэсний допингийн эсрэг байгууллагат холбогдох хэргийн маргаан таслах ажиллагаа явагдаж байна.