Жүжигчин Ом Ки Жүн хуримаа хийхээр болжээ

Энэ жил 48 нас хүрч буй Өмнөд Солонгосын А зэрэглэлийн жүжигчдийн нэг Ом Ки Жүн алдартан бус найз бүсгүйтэйгээ хуримаа хийхээр болсон тухай мэдээлэл цацагдаж эхэлжээ. 

The FACT-аас өгсөн мэдээлэлд хосуудын хурим ирэх 12 дугаар сард болох аж. Жүжигчин Ом Ки Жүн найз бүсгүйгээ олон нийтээс хамгаалахын тулд удаан хугацааны турш нууцаар болзжээ. Тиймээс түүний найз бүсгүйн тухай мэдээлэл цахим орчинд төдийлөн байдаггүй байна. 

Хуримын ёслол ойр дотнын найз нөхөд, гэр бүлийнхний хүрээнд зохион байгуулагдах ажээ. 

Жүжигчин Ом Ки Жүн 1995 онд "Richard 3" жүжигт тоглон дебютээ хийж байсан. Үүнээс хойш карьераа тасралтгүй өсгөсөөр яваа түүний "Пентхаус" цувралын Жү Дан Тегийн дүр олон нийтийн дунд хамгийн алдартай нь билээ.