Х.Нямбаатар: Хот төлөвлөлт рүү халдсан геноцедийг зогсооё

“Go Mongolia” уриан дор болж байгаа Монголын эдийн засгийн 11 дэх удаагийн форум хоёр дахь өдрөө Төрийн ордонд үргэлжилж байна. Өнөөдрийн форумын эхэнд УИХ-ын дарга Д.Амарбаясгалан үг байр сууриа илэрхийлж, эдийн засгийг хөгжүүлэх, хөрөнгө оруулалтыг нэмэгдүүлэхийн тулд УИХ-ын зүгээс нээлттэй хамтран ажиллана гээд ойрын үед хийж хэрэгжүүлэх ажлынхаа талаар дэлгэрнгүй танилцууллаа.

Монголын эдийн засгийн форумын хоёр дахь өдрийн нэгдсэн хэлэлцүүлэг “Хотын реформ”, “Банкны салбарын хөрөнгө оруулалт” сэдвийн хүрээнд үргэлжилж байна. “Хотын реформ” хэлэлцүүлэгт Нийслэлийн Засаг дарга бөгөөд Улаанбаатар хотын захирагч Х.Нямбаатар, УИХ-ын гишүүн П.Сайнбаяр, УИХ-ын гишүүн Г.Лувсанжамц, “Монголын эдийн засгийн форум”-ын Ерөнхий нарийн бичгийн дарга  Ч.Ганхуяг, Франц улсаас Монгол Улсад суугаа элчин сайд Себистьян Сурун нар оролцож байна.

Хэлэлцүүлгийн эхэнд Нийслэлийн Засаг дарга бөгөөд Улаанбаатар хотын захирагч Х.Нямбаатар хэлэхдээ “Монгол Улсын Ерөнхий сайдтай уулзаж шинэ Засгийн газрын хөтөлбөрийн 1 дүгээр зүйлд Улаанбаатар хотын хөрөнгө оруулалт, хөгжлийн бодлогыг асуудлыг тусгаж өгөхийг хүссэн. Үүнийг Ерөнхий сайд маань шийдэхээр тохиролцсон. Энэ хүрээнд нийслэлийн төвлөрөлийг сааруулж, түгжрэлийг бууруулахын тулд юуны өмнө Их тойруу парлель зам, метроны хэвтээ болон босоо тэнхлэгийн бүтээн байгуулалтын ажлыг эхлүүлнэ. Хотын хойд болон өмнөд хэсгийн дэд бүтэцийн ялгааг арилгаж, гэр хорооллыг орон сууцжуулахын тулд дэд төвүүдийг байгуулна. Үндсэн хуулийн нэмэлт өөрчлөлт, Хот тосгоны эрх зүйн байдлын тухай хуулийн дагуу нийслэл хот маань 14 хот, дагуул хотуудаас бүрдэх бөгөөд 2028 оноос хорооны дарга нар хорооллын захирагч, хорооллын дарга нар хотын захирагч болцгооно. Тэд нарыг иргэд өөрсдөө сонгоно.

Уг нь Улаанбаатар хотын хэсэгчилсэн болон ерөнхий төлөвлөгөө байгаа боловч 1990 оноос хойш бүгдийг нь зөрчсөн. Шинээр баригдсан хорооллуудаас шударгаар боссон хороолол нэг ч байхгүй. Бүгд газраа авлига, хээл харуулиар авцгаасан. Одоо энэ хот төлөвлөлт рүү халдсан геноцедийг зогсооё. Цаашид нийслэлийн игэдэд 0.7 газар олгохгүй. Бүх газрыг төлөвлөлтийн дагуу дуудлага худалдаагаар өгнө.

Ирэх оноос Улаанбаатар хотод маш олон дэд бүтэцийн төслүүд хэрэгжиж эхэлнэ. Үүнийг дан ганц дотоодын хүч, хөрөнгөөр гүйцэтгэж чадахгүй. Иймд гадаадын хөрөнгө оруулагч нарыг хамтран ажиллахыг уриалж байна гэв.

Ийнхүү “Хотын реформ” хэлэлцүүлэг үргэлжилж байна. Монголын эдийн засгийн форум өнөөдөр хоёр нэгдсэн хэлэлцүүлэг, 8 салбар хуралдаанаар үргэлжилнэ. Салбар хуралдааны хувьд үдээс хойш болох Элчин сайд нарын хуралдаан оролцогчдын анхаарлыг ихээхэн татаж байна.