Италийн домогт хөлбөмбөгч Ф.Барези Монголд ирлээ

Италийн домогт хөлбөмбөгч, дэлхийн бүх цаг үеийн супер оддын нэг Франко Барези Монголд ирлээ. Италийн шигшээ болон "Милан" клубт гайхалтай он жилүүдийг өнгөрөөсөн энэ эрхмийг манай оронд хөл тавина гэсэн яриа оны эхэнд гараад байсан нь ийн биеллээ олов. Тэрбээр Улаанбаатар хотын захирагч бөгөөд Нийслэлийн Засаг дарга Г.Мөнхбаярын санаачилгаар "Милан клубын өсвөрийн зуслан Улаанбаатар-2011" төсөл хөтөлбөрийн хүрээнд Монголд ирсэн. Барези "Милан" клубын дасгалжуулагчдын хамтаар 13 хүртэлх насны 200 гаруй өсвөрийн хөлбөмбөгчдийн дунд явуулах сургалт нь өнөөдөр эхлэх бөгөөд долоо хоног үргэлжлэх юм. Уг сургалтаас шалгарсан гурван хүүхдийг аравдугаар сард болох "Дэлхийн хүүхдийн зуслан"-д амрах эрхээр шагнаж урамшуулах ажээ. Барези алдарт "Милан"-ы хүүхдийн багаас тамирчны замналаа эхлүүлсэн бөгөөд насанд хүрэгчдийн багт нь 1977-1997 онд 20 жил үнэнчээр хүчин зүтгэж_, 719 тоглолтод оролцож 31 гоол хийж байв. Энэ хугацаандаа "Аваргуудын лиг"-т гурав, Тив хоорондын цомд /Одоогийн Клубуудын ДАШТ/ хоёр, Европын супер цомд хоёр, Италийн "Сери А"-д зургаа, Супер цомд дөрвөн удаа түрүүлж, 1989 оны Европын шилдэг хөлбөмбөгчний шалгаруулалтад  хоёрдугаар байр эзэлж, "Мөнгөн бөмбөг" хүртсэн. Домогт ахлагчаа 1997 онд зодог тайлахад "Милан"-ы клуб 6 дугаарыг нь мөнхөлж, улмаар 1999 онд клубынхээ зууны шилдэг тоглогчоор шалгаруулж байлаа. Түүнчлэн Барези Италийн шигшээ багийн 1980, 1990-ээд оны супер амжилттай салшгүй холбоотой. Тэрбээр ДАШТ-д 1982 онд алт, 1994 онд мөнгө, 1990 онд хүрэл медаль хүртэж, иж бүрэн цуглуулгатай болсон цөөн хөлбөмбөгчийн нэг юм. Италийн хөлбөмбөгийн холбоо 2004 онд түүнийг Италийн зууны шилдэг хөлбөмбөгчөөр тодруулсан. Энэ мэтчилэн Барезигийн ялалт, амжилтыг дурдаад байвал хэдэн хуудас ч бичиж болох тул ингэсгээд өндөрлөе.

Эх сурвалж: Өдрийн шуудан сонин