Монгол Улсын БХЯ-нд ОХУ-аас цэргийн техник хүлээлгэн ӨГЛӨӨ

ОХУ-ын Батлан хамгаалах яамнаас Монгол Улсын Батлан хамгаалах яаманд цэргийн техник хүлээлгэн өглөө. Цэргийн техникийг хүлээн авах ёслол Налайхын цэргийн нисэх онгоцны буудалд болсон юм. Тус нисэх буудалд ОХУ-аас чанарын өндөр түвшинд хийсэн цэргийн техник, байгууламжийг хүлээлгэн өглөө.

Монгол Улсын Зэвсэгт хүчний Агаарын цэргийн командлагч, хурандаа Т.Ганбат “Өнөөдөр Монгол Улсын зэвсэгт хүчний Агаарын цэргийн хувьд маш чухал өдөр тохиож байна. Монгол Улсын Зэвсэгт хүчний Агаарын цэрэг хөгжлийнхөө нэн шинэ үеийн эхэнд явж байна гэж би ярих дуртай. Орчин үеийн агаар, сансрын хүчин болон хөгжих зорилго тавиад байгаа бид улсын стратегийн зориулалттай энэхүү нисэх буудлын шинэчлэлийн ажлыг хийж эхлээд байгаа юм. ОХУ-ын цэргийн Агаар, сансрын хүчин хоёр улсын Батлан хамгаалах яамд хоорондын нэмэлт гэрээгээр энэ нисэх буудлыг сэргээн шинэчлэх ажлыг хийж эхэлсэн. Налайхын цэргийн нисэх онгоцны буудлаас 1993 оноос хойш цэргийн нисдэг тэрэг нисээгүй. ОХУ, Монгол Улсын Батлан хамгаалах яамд хоорондын цэргийн хамтын ажиллагааны гэрээний хүрээнд нэмэлтээр энэ нисэх буудлыг шинэчилж, үйл ажиллагаа явуулдаг болгох талаар хамтарч ажиллаж байгаа юм” гэлээ.

Цэргийн нэмэлт гэрээний дагуу ОХУ энэ удаад 200 гаруй тэрбум төгрөгийн хөрөнгө оруулалтаар Налайхын цэргийн нисэх буудалд шаардлагатай байгууламж, техник хэрэгслийг нийлүүлж байгаа аж.

ОХУ-ын талаас цэргийн зориулалттай автомашин, техник, командлалын байр зэрэг нисэх буудлын үйл ажиллагаа явуулахад шаардлагатай барилга байгууламжийг барьж өгчээ.

Энэхүү шинэчлэлийг гардан хэрэгжүүлж, гүйцэтгэгчээр ажилласан “Качество” шинжлэх ухаан, техникийн төвийн төлөөлөл мөн цэргийн техник хүлээлгэн өгөх ёслолд оролцсон юм.

Монголын Зэвсэгт хүчний агаарын цэрэг хөгжлийнхөө шинэ үеийг эхэлж, удахгүй Налайхын цэргийн нисэх буудлаас онгоц хөөргөж, нийслэл Улаанбаатар хотын аюулгүй байдлыг хангахад туйлын ойрхон байгааг Монгол Улсын Зэвсэгт хүчний Агаарын цэргийн командлагч, хурандаа Т.Ганбат хэлж байсан юм.

ВИДЕО ҮЗЭХ: