М.Нарантуяа-Нара: Би намынхаа үйл ажиллагаанд оролцохгүй байгаа

УИХ-ын гишүүн М.Нарантуяа-Нара болон ИЗНН-ын дарга Б.Батбаатар нарын хооронд ойлголцлын асуудал үүссэн нь нэгэнт тодорхой болжээ. Б.Батбаатарын хувьд М.Нарантуяа-Нараг уншиж судлах шаардлагатай байгаа тухай дурдан, намынхаа үйл ажиллагаанд нээлттэй оролцох хэрэгтэй хэмээсэн бол М.Нарантуяа-Нара гишүүн дараах байдлаар өөрийн байр суурийг ийн илэрхийлжээ. 

УИХ-ын гишүүн М.Нарантуяа-Нара:

-ИЗНН-ыг сонгосон хүмүүсийн өмнөөс ичиж байна. Хуралдаа суухгүйгээр яаж сөрөг хүчний ажил хийх юм. Би намынхаа үйл ажиллагаанд оролцохгүй байгаа. Би оролцох боломжгүй байгаа. Их ажилтай байна. Надад мэдэхгүй, чадахгүй зүйл их байна. Орж ирмэгцээ бүх зүйлийг мэдээд, бүх асуудлыг шийддэг хүн болчихгүй. Тиймээс уншиж, судлах ажил их байгаа учраас оролцохгүй байгаа. Намын дарга саяын сонгуулиар цаг зав, хүч, хөрөнгө мөнгө зарцуулж ажилласан. Гэхдээ манай намаас хүн гараагүй. Харин би намынхаа хүрч чадахгүй орхигдож байгаа асуудлуудад тодорхой хэмжээгээр анхаарал тавьж ажилласан. Энэ хүрээнд манайхаас Төв аймгийн Баянчандмань сумаас дөрөвхөн суудал авч чадсан. 

Үүнд намын дарга бид хоёрын дунд ямар нэгэн зөрчил, хувийн эрх ашиг хөндөгдөөд байсан зүйл байхгүй. Гэхдээ бид зарчимч байх ёстой. Өөрсдийгөө хаацайлж бусад руу дайрч болохгүй. Сүүдрийн Засгийн газар байгуулах тал дээр би ямар ч мэдээлэлгүй байсан.