"Дайчид" дахиад финалд хүрэх үү? #1

Ц.Энхтүвшин ("Таван цагариг" сонин)

Одоогоос яг сарын өмнө буюу NBA ( Үндэсний сагсанбөмбөгийн холбоо) лигийн 2024/2025 оны улирлын тоглолтын өмнө "Голден стэйт уорриорз"( Алтан мужийн дайчид) -ийг тун жигдхэн хүчирхэг баг олонтой "Баруун" бүсийн эхний тавд бичигдэнэ гэвэл ихэнх нь инээж, бас олон хүн эргэлзэх байсан биз ээ.

Тэгвэл өнөөдөр 12 тоглолтын дараа "Golden state warriors" 10 хожил,2 хожигдолтой "Баруун" бүсийг тэргүүлж явна.

Мэдээж тэдний өмнө бараг хагас жил шахуу үргэлжлэх урт улирал, чилийсэн 70 тоглолт хүлээж буй болохоор шууд плей-оффт тэдээр эдээр гарна, гарахгүй гэж таамаглахыг оролдох нь утгагүй.

Харин сүүлийн 10 жилд NBA-д хаанчилсан ( 6 финал, 4 түрүү) "Дайчид" улирлын эхний 12 тоглолтын дараа 10-аас дээш хожилтой эхлэхэд ямар үр дүнд хүрч байсан баримт тун сонирхолтой. Тодруулбал,
 

• 2015-16 он. 12-0. Финалд үлдсэн
• 2021-22 он. 11-1. Аварга болсон
• 2014-15 он. 10-2. Аварга болсон
• 2016-17он. 10-2. Аварга болсон
• 2018-19 он. Финалд үлдсэн
• 2024-25 он. ???

Мөн NBA-гийн олон статистик үзүүлэлтээр " Уорриорз" лигид дээгүүр бичигдэж байгаа. Тухайлбал,
 

• Дундаж оноо: 121.3 (гуравт)
• Самбар: 49.0 (хоёрдугаарт)
• Дамжуулалт: 30.3 (нэгдүгээрт)
• 3 онооны хувь: 39.2 (дөрөвт)
• Бөмбөг булаалт: 9.8 (дөрөвт)

Үүнээс гадна довтолгооны ( 118.4) болон хамгаалалтын ( 107.9) чансаагаар лигид дөрөвдүгээрт бичигдэж байна.

Тоо, статистик мэдээж ямар нэг зүйл " хэлж" байгаа нь тодорхой. Энэ жилийн NBA-гийн аварга " Бостон селтикс"-ийг талбай дээр нь буулган авсан, мөн дэд аварга "Даллас"-ыг хожсон нь ямар ч багийг хожиход " дайчид" бэлэн буйгаа харуулсан. Дээр нь "Алтан мужийн дайчид"-д аваргын сэтгэл зүй хангалттай бий. Энэ улирлыг ямар үр дүнтэй үдэх бол "дайчид" гэсэн хүлээлт улам их боллоо. Цаг хугацааг хүлээхээс...