Д.Нандинболор: Миний хүү зүрх судасны өвчтэй байгаагүй

Ой хоёр сартай хүүхэд Өдөр өнжүүлэх төвд хахсан байж болзошгүйгээр нас барсан хэргийн асуудлаар ар гэрийнхэн нь Шүүх шинжилгээний ерөнхий газрын гадна хэвлэлийнхэнд мэдээлэл хийлээ.

Сар орчмын өмнө буюу 2024 оны аравдугаар сарын 28-ны өдөр Сонгинохайрхан дүүргийн нутаг дэвсгэрт байрлах Өдөр өнжүүлэх төвд хүүхэд нас барсан эл харамсалтай хэрэг гарсан. 

Талийгаач хүүгийн ээж Д.Нандинболор шүүхийн шинжилгээний хариуд гомдолтой байгаа бөгөөд энэ талаараа дараах мэдээллийг өглөө. 

ДЭЛГЭРЭНГҮЙГ ВИДЕО ХЭЛБЭРЭЭР ҮЗЭХ
 

Тэрбээр "Шүүх шинжилгээний хариу хэрэг явдал болсноос хойш 20 гаруй хоногийн дараа гарлаа. Талийгаач хүүг минь бөөрний дутагдалтай, зүрх судасны архаг өвчлөлтэй байсан учраас зүрх нь гэнэт хаагдсан гэж шинжилгээгээр дүгнэсэн байна. Миний хүүхэд эрүүл, саруул хүүхэд байсан. Өвчтэй байх боломжгүй. Хүүхэд маань ханиадтай байсан ч хатгаа болоогүй байсан. Бид ханиадыг нь эмчилснийхээ дараа Өдөр өнжүүлэхэд аваачиж өгсөн. Шүүх шинжилгээний хариуг хүлээн зөвшөөрөхгүй. 

Би үнэхээр гомдолтой байна. Багш нар болон тухайн цэцэрлэгийн удирдлагуудад маш их гомдож байна. Шүүх шинжилгээний хариу 14 хоноод гарах ёстой. Гэтэл 20 гаруй хоногийн дараа гарлаа. Ямар нэгэн байдлаар шүүхийн шинжилгээний хариунд нөлөө орсон гэж бид үзэж, тэдний танилцуулсан хариутай санал нийлэхгүй байгаагаа илэрхийлж байна. Хуулийн байгууллагуудад хандана" гэлээ.