Охиноо эмнэлэгт үзүүлж буй И Сын Гигийн зураг олны хайрыг татав

Жүжигчин, дуучин И Сын Гигийн хувийн амьдрал шүтэн бишрэгчдийнх нь зүгээс багагүй эсэргүүцэлтэй тулгардаг. Түүний хуримын ёслолыг эсэргүүцсэн шүтэн бишрэгчид нь тэмцэл хийж, өөрсдийн үзэл бодлоо илэрхийлсээр байсан ч И Сын Ги хайр сэтгэлдээ үнэнч байхаа амлан, бүхий л хариуцлагыг өөрөө үүрнэ хэмээж байсан. Хосууд хуримаа хийж, удалгүй анхны хүүхдээ өлгийдөн авсан. Үүнээс хойш карьер нь уналтад ороод байсан И Сын Ги аав хүнийхээ үүргийг сайн биелүүлж байгаагаа инстаграм хуудсаараа дамжуулан илэрхийлжээ.

Тэрээр 10 сартай охинооо Сөүлийн Үндэсний их сургуулийн Хүүхдийн эмнэлэгт үзүүлж буй ховор зургаа хуваалцан "Хүүхэд бүхэн эрүүл, аз жаргалтай өсөн торних болтугай" хэмээн бичжээ. Уг зураг нийтлэгдсэн даруйдаа 1 сая орчим хандалт авсан байна. 

Уг зураг ийнхүү хандалт өндөртэй байгаа нь охиныхоо зургийг олонд хуваалцаж буй ховор тохиолдолтой холбоотойн сацуу 2022 онд тус эмнэлэгт хандивласан хандивтай холбоотой. И Сын Ги 2022 онд хуучин энтертайменттайгаа хийсэн маргаанаас шийдвэрлэгдсэн 5 тэрбум воноо бүгдийг нь хандив болгон өгсөн бөгөөд үүний 2 тэрбум воныг Сөүлийн Үндэсний их сургуулийн хүүхдийн эмнэлэгт хандивлажээ. 

Түүний нийтэлсэн дээрх зургийн ар талд И Сын Гигийн нэртэй хүндэт самбар харагдах ба хандивын арга хэмжээнд идэвхтэй оролцож, өгөөмөр сэтгэл гаргадагт нь олон нийт талархал илэрхийлжээ.