ФИФА-гийн оны шилдгүүд тодорлоо

Ц.Энхтүвшин, "Таван цагариг"

ФИФА буюу Олон улсын хөлбөмбөгийн холбооноос жил бүр "The BEST FIFA Football awards" ёслолын ажиллагааг зохион байгуулж, хөлбөмбөгийн ертөнцийн оны шилдгүүдээ тодруулдаг уламжлалтай.

Санал асуулгад ФИФА-ийн гишүүн орнуудын шигшээ багийн ахлагч, дасгалжуулагчид, мөн ФИФА-аас хүлээн зөвшөөрөгдсөн сэтгүүлчид, хөгжөөн дэмжигчид хувь тэнцүүлэн оролцдог бөгөөд миний хувьд энэ санал асуулгад найм дахь удаагаа оролцлоо.

Энэ жилийн "The Best FIFA football awards-2024" өчигдөр (2024.12.17) Катарын Доха хотноо боллоо.

Хөлбөмбөгч сонирхогчид, хөгжөөн дэмжигчид, хэвлэл мэдээллийнхний хамгийн их сонирхол татдаг Оны шилдэг хөлбөмбөгчнөөр Бразилийн шигшээ болон "Реал Мадрид" багийн довтлогч Винисиус Жуниор шалгарсан бол эмэгтэй оны шилдэг хөлбөмбөгчнөөр Испанийн шигшээ болон "Барселона" багийн хагас хамгаалагч Айтана Бонмати нар шалгарлаа.

Мөн оны шилдэг хаалгачаар Э.Мартинез (Аргентин, "Астон вилла"), А.Нихар (АНУ, "Чикаго), шилдэг дасгалжуулагчаар К.Анчелотти (Реал.М), Э.Хэйз (АНУ) нар тодров.
 

Үүнээс гадна оны шилдэг гоолын шагнал Пушкаш, Марта нарын нэрэмжит шагналыг Гарначо, Марта нар хүртлээ. Бразилийн домогт "Юбкатай Пеле" хэмээн алдаршсан Марта өөрийнхөө нэрэмжит шагналыг хүртэж, ховор түүх бүтээв.

Мөн Дэлхийн шилдэг гарааны XI -ийг мэргэжлийн хөлбөмбөгчдийн холбооны саналаар тодруулдаг.

Бас нэг ганган шагнал нь шилдэг фанатын шагнал.

Миний хувьд Монголынхоо фанат, дугуйгаар Монголоос Англид жил "жийж" байж хүрэн хайртай "Манчестер Юнайтед" багийнхаа цэнгэлдэхэд хүрч, шүтээн Рунитайгаа уулзсан Очирваань дүүгээ ФИФА-ийн шалгаруулалтын комисс, хэвлэл мэдээллийн албанд санал болгож, түүний тухай мэдээллийг хүргэсэн ч харамсалтай нь шилдэг гуравт багтаж, санал асуулгад оролцож чадсангүй.

Гэхдээ Очирваань бол үнэхээр гайхамшигтай түүх бүтээж, олон хүүхэд залууст үлгэр дууриалал болсныг энд тодруулж хэлье.