ОУОХ-ны Ерөнхийлөгчийг сонгох ЧУУЛГАН эхэллээ

Олимпын хөдөлгөөний дээд байгууллага Олон улсын олимпын хороо (ОУОХ)-г ирэх найман жилд удирдах Ерөнхийлөгчийг сонгох түүхэн чуулган болох ОУОХ-ны 144 дэх удаагийн хурал өнөөдөр эхэлж байна. Чуулган гуравдугаар сарын 19-21-нд үргэлжлэх ба олимпын хөдөлгөөний дараагийн шинэчлэлийн чиглэлийг тодорхойлох болно.

Чуулганд оролцохоор ОУОХ-ны гишүүн, МҮОХ-ны Ерөнхийлөгч Б.Баттүшиг Грект ажиллаж байна. 

ОУОХ-ны Ерөнхийлөгч Томас Бах нь 2013 оноос эхлэн 12 жил тасралтгүй энэхүү байгууллагыг амжилттай удирдан чиглүүлсэн бөгөөд дэлхий дахинаа тохиосон Ковидын цар тахлын хүндхэн үед ч “Токио 2020”, “Бээжин 2022” олимпын наадмуудыг амжилттай зохион байгуулснаас гадна “Olympic Agenda 2020”, “Olympic Agenda 2020+5” зэрэг стратеги төлөвлөгөөг хэрэгжүүлсний дүнд спонсор байгууллагын дэмжлэг 60 хувиар нэмэгдээд байна.

ОУОХ-ны Ерөнхийлөгчид долоон нэр дэвшигч өрсөлдөж байгаа бөгөөд маргааш болох сонгуулиар 2025 оны олимпын циклд ОУОХ-г удирдах шинэ Ерөнхийлөгч сонгогдох билээ.

Сануулахад, хоёр өдрийн өмнө болсон ОУОХ-ны Гүйцэтгэх зөвлөлийн хурлын шийдвэрээр боксын спортын төрлийг “Лос Анжелес 2028” олимпын наадмын хөтөлбөрт багтаах болсныг Томас Бах мэдэгдэж, энэхүү шийдвэрийг өнөөдөр эхлэх чуулганы үеэр гишүүд баталгаажуулна гэдэгт итгэлтэй байгаагаа илэрхийлсэн.