Кабул дэлхийн анхны ундны усгүй хот болж болзошгүй
Афганистаны нийслэл Кабул хотод 2030 он гэхэд ундны усгүй болох аюул нүүрлэж байна гэж олон улсын хүмүүнлэгийн Mercy Corps байгууллагын тайланд онцолсон байна.
Мэргэжилтнүүдийн дүгнэлтээс үзвэл сүүлийн 10 жилд тус хотын хөрсний усны түвшин 30 метрээр доошилжээ. Үүний шалтгаан нь эрчимтэй хотжилт, уур амьсгалын өөрчлөлтийн үр дагавар гэж шинжээчид дурдсан байна. Хотын худгуудын тал нь ширгэсэн бөгөөд усны хэрэглээ нь усны нөөц байгалийн замаар сэргэх хурдыг хэд дахин давж байна. Үүний улмаас жилд ундны усны хомстол 44 сая куб метрт хүрчээ. Эл нөхцөл байдал хотын долоон сая оршин суугчийн амьдралыг сүйрүүлэх үр дагавартай.
Афганистан дахь Mercy Corps байгууллагын захирал Дэна Карригийн өгүүлснээр, усны хомстол хүн ам шилжин суурьшихад хүргэж, олон улсын хамтын нийгэмлэгийн тусламжгүй дүрвэгсдийн болон нийгмийн асуудал улам хурцдаж байна. Ундны усны үлдсэн нөөцийн чанарын асуудал мөн ноцтой түвшинд хүрчээ. Гүнийн усны 80 орчим хувь хэрэглээний бохир ус, давс, хүнцлээр бохирдож, унданд хэрэглэх боломжгүй болгож байна. Тиймээс ард иргэд ундны ус худалдан авахад зориулж орлогынхоо 30 гаруй хувийг зарцуулахад хүрч байна.
Холбоотой мэдээ
Сэтгэгдэл ( 0 )