Л.Баяржаргал: Биднийг мөнгө авсан гэх асуудлыг "нотлоод өгөөч ээ" л гэж байна

Мэдээллийн www.neguun.mn сайтын сэтгүүлч, сурвалжилгын багийг 2026 оны 03 дугаар сарын 19 өдрийн 16:00 цагийн орчим албан ажлаа гүйцэтгэж явах үед Эрүүгийн цагдаагийн ажилтан гэх хүмүүс хүч хэрэглэн авч явсан гэх асуудалд Цагдаагийн Ерөнхий газраас мэдээлэл өглөө. 

Энэ үеэр тус сайтын сэтгүүлч У нь "Цахим орчинд миний хувийн, эмзэг мэдээллийг тараана гэж сүрдүүлэн 50 сая төгрөг авсан” гэх гомдол мэдээлэл цагдаагийн байгууллагад гаргасан. Цагдаагийн байгууллага мөрдөн шалгах ажиллагаа явуулахад, "Нэгүүн.мн сайтын сэтгүүлч У нь цахим орчинд хувийн, эмзэг мэдээллийг тараана гэж сүрдүүлэн иргэн Д-ээс 50 сая төгрөг авсан нь нотлох баримтаар тогтоогдсон" хэмээн мэдээлсэн.

Тэгвэл энэ талаар тус сайтын эрхлэгч Л.Баяржаргал дараах тайлбарыг өглөө. 

Би энэ салбарт 10 гаруй жил ажиллаж байна. Хэн нэгэн дарга албан өрөөндөө архидан согтуурч, бүр шээсэн байдаг. Үүнийг ил тод мэдээлсний төлөө тухайн иргэн дарамталсан, сүрдүүлсэн, эрүүгийн цагдааг хөдөлгөнө гэж хэлсэн. Яг үүний маргааш нь биднийг редакциар нь цагдан хорихыг завдсан нөхцөл байдал үүссэн.

Энэ асуудал нь юу вэ гэвэл нэг сэтгүүлч нь 30 сая төгрөг, нөгөөх нь 50 сая төгрөг авсан гэж ярьж байгаа юм. Би үүнийгээ нотлоод өгөөч ээ л гэж байгаа юм. Яагаад гэвэл би тийм мөнгө аваагүй. Тийм боломжгүй.

Миний хувьд тухайн мөрийтэй тоглоомчдоос мөнгө авсан тохиолдол байхгүй. Харин ч тэр мөрийтэй тоглоомчид болон нэр холбогдсон байгууллагын удирдах албан тушаалтныг шалгасан эсэх нь эргэлзээтэй байна. Цагдаа үргэлж гэмт хэрэгтнүүдийг өмгөөлж гарч ирдэг нь нийгэмд маш муухай борих харагдаж байна. Гэтэл сэтгүүлч нар эсрэг талдаа гэмт хэргийг нь илрүүлээд зогсож байна. Тэгтэл сэтгүүлчдийг л яллах гээд, гэмт хэрэгтэн болгож харагдуулах гээд байгаа нь онцгүй байна. Үүнийг ард иргэд соргогоор харж байгаа байх гэдэгт итгэлтэй байна.