Макс групп Лондонгийн олимпийн аваргуудад байр амлав

Макс группийн удирдлагуудаас  ирэх зун болох Лондонгийн олимпод оролцох тамирчдын бэлтгэлийг эрчимжүүлэх, идэвхийг дээшлүүлэх зорилгоор оролцох тамирчиддаа олимпийн аварга болохыг хүсэн ерөөж алтан медаль авсан тамирчдыг уламжлал ёсоор Макс группийн барьсан 2 өрөө байраар шагнан урамшуулна гэдгээ мэдэгдлээ. Аливаа шагнал урамшууллыг тэмцээн уралдаан эхлэхээс өмнө зарлах нь тамирчдын бэлтгэл суургуулилалт, идэвхийг дээшлүүлэх онцгой ач холбогдолтой.  Макс группын удирдлага олимп, дэлхийн аваргын дэвжээнд амжилттай оролцон эх орныхоо алдрыг мандуулсан  тамирчдыг шагнан урамшуулдаг уламжлалтай. 2008 онд Бээжингийн зуны 29-р их наадмын бэлтгэлийн үеэр олимпийн аварга болохыг ерөөж алтан медаль авсан тамирчныг Макс Өргөө компанийн барьсан 2 өрөө байраар шагнана гэж амласан. Олимпод  гарамгай амжилт гаргаж, алтан медаль хүртсэн Н.Түвшинбаяр, Э.Бадар-ууган нарыг амалсан ёсоор  байраар шагнасан билээ.