”Лондон-2012” Олимпийн бамбарыг Дэвид Бекхэм шилжүүллээ

Зуны XXX Олимпийн тоглолтын галыг тавдугаар сарын 10-ны өдөр Эртний Олимпод асаасан билээ. Харин дараа нь бамбарыг Грекийн нутаг дэвсгэр дээгүүр авч явахдаа нийт гурван мянган километр зам туулж Афины алдарт Акропольд хүргэжээ. 2012 оны тавдугаар сарын 18-ны өдөр Грекийн нийслэл Афин хотын "Панатинаикос" цэнгэлдэх хүрээлэнд олимпийн галыг албан ёсоор шилжүүлэх ажиллагаа зохион байгуулагдлаа. Энэхүү үйл ажиллагаанд "Лос-Анжелес Гэлэкси"-гийн хагас хамгаалагч Дэвид Бэкхэм оролцож, Их Британи руу галыг шилжүүлсэн юм. Тавдугаар сарын 18-ны өдөр тусгай онгоцоор олимпийн галыг Лондонд авчирсан бөгөөд 70 хоногийн дотор Английн нутаг дэвсгэр дээр 12.800 километр замыг туулна. Олимпийн гал асаах ажиллагаа долдугаар сарын 27-ны өдөр болох юм байна.

Н.Батцэнгэл