Улсын заан Ч.Санжаадамбыг 15 саяар шагналаа

“Эрдэнэт үйлдвэр” ХХК-ийн “Хангарьд” спорт клубын бөх Ч.Санжаадамбад тус үйлдвэрийн Ерөнхий захирал Ч.Ганзориг өнөөдөр 15 сая төгрөг гардуулж баяр хүргэлээ. Өнгөрсөн жилийн Ардын хувьсгалын 90 жилийн ой, Үндэсний их баяр наадамд уран мэхийг уралдуулан сайхан барилдаж, Монгол Улсын заан цол хүртсэнийг нь үнэлж ийнхүү шагнажээ.

“Эрдэнэт” үйлдвэр нь нийгмийн хариуцлагыг хэрэгжүүлэгч үйлдвэрийн хувьд үндэсний спортыг дэмжиж, хөгжүүлэхэд ихээхэн анхаарч ажилладаг юм. Түүний нэг тод илрэл нь энэхүү шагнал юм. Мөн “Эрдэнэт үйлдвэр” ХХК нь өнгөрсөн жилийн баяр наадамд амжилт гаргасан тамирчдаа шагналаа. Тухайлбал, эрэгтэй харваачдаас түрүүлсэн улсын мэргэн Б.Ёндонд 20, эмэгтэй харваачдаас дөрөвдүгээр байр эзэлсэн З.Энхтуяад гурван сая төгрөгийн шагнал гардуулав. Ерөнхий захирал Ч.Ганзориг, Шагайн харвааны тэмцээнд улсад түрүүлж, улсын мэргэн цол хүртсэн тус үйлдвэрийн АТБ-ын жолооч Н.Тогоог таван сая төгрөгөөр урамшуулж, шагнал гардсан нийт тамирчдад энэ жилийн баяр наадамдаа улам их амжилт гаргахыг хүсэн ерөөжээ.

А.ТЭМҮР