“УНАГАН ХУРД” галын уяач Д.Баяраа: Хэдэн сайхан соёолон мордуулна

Нар хур нь тэгширсэн наадмын энэ өдөр Монгол улсын тэргүүн гал уяа болох  “УНАГАН ХУРД” галаар зочилж наадмын сонин сайхныг хөөрөлдлөө.

"АНУ СЕРВИС" ХХК - ний гүйцэтгэх захирал Б.Буяннэмэх үүсгэн байгуулсан  "УНАГАН ХУРД" гал нь  2011 онд улс бүсийн наадмаас авсан айраг түрүүгээрээ оны шилдэг галаар шалгарсан бөгөөд энэ амжилтаараа тус галын тэргүүн Б.Буяннэмэх алдарт уяач цолны болзол хангасан. Улиран одсон 2011 онд үндэсний морин уралдааныг хөгжүүлэх үйлсэд амжилт гарган бусдыгаа ажил үйлсээрээ манлайлсан уяач, гал уяа, салбар холбоо, шилдэг ивээн тэтгэгчдийг үнэлэн дүгнэхэд ММСУХ-ны шилдэг уяачаар улс, бүсийн уралдаанаас хоёр түрүү, есөн айраг хүртсэн Монгол Улсын манлай уяач Д.Одгэрэл шалгарсан юм.

-Өнөө жилийн наадамд хурдан морь айрагдууллаа. Энэ жилийн наадмаар нийтдээ хичнээн морьд уяж сойж байна вэ?

-Энэ жилийн наадмын өнгө их сайхан байна. Нас болгонд морь тавьж байна даа. Хязаалан үрээ минь сайхан уралдаж таваар орлоо.

-Танай галын болон өөрийн тань адуу  хаанахын ямар угшилтай вэ?

-Миний адууны удам гэвэл баруун, зүүн аймгууд гээд олон газраас цуглуулсан адуунууд бий дээ. Гол төлөв зүүн чигийн адуунууд байгаа. Хүрэн үрээний минь хувьд гэвэл МУ-ын Манлай уяач  Д.Одгэрэл ахын маань “тормон хонгор” гэдэг азарганы төл. Энэ жилийн наадамд сайхан уралдлаа.

-Хүрэн үрээ өмнө нь ямар амжилт гаргаж байв аа?

-Ноднин улсын наадамдаа шүдлэн үрээ дөрвөөр давхисан. Тамирын хурдад түрүүлсэн.

-“УНАГАН ХУРД” галд хичнээн уяачид багтаж хурдан морьдоо уяж сойж байгаа вэ?

- За Манай уяаны дарга С.Будням ах маань байна. Б.Буяннэмэх гэдэг залуу байгаа, би, Мөнгөншагай, Аса Д.Дагвадорж, Энхтөр, Жавхлан гэсэн бүрэлдэхүүнтэй гал байгаа. Дандаа залуучууд гурван жилийн өмнөхөн энэхүү галаа нээсэн. Сүүлийн гурван жил бид нар чинь нийлээд улс бүсээс нийтдээ нэг 20-иод айраг түрүү авчихлаа.

-Та хэдэн жил морь уяж байгаа вэ? Танайхан чинь уяачийн удамтай байхаа?

-Манай аав моринд дуртай, өөрөө тэр үедээ дарга хүн байсан. Тэр үед чинь дарга хүн чинь морь уяад байж болдоггүй. Харин сайхан адууг үнэ хайрлахгүй авчихдаг сайхан адуу цуглуулдаг тийм хүн байсан.

-Үндэсний их баяр наадмын дараа бүсийн томоохон уралдаанууд болно давхар уяагаар уралдах уу?

-За тэгээд морьдынхоо багцаа, байдлыг харж байгаад болно доо. Одоогоор яг тийшээ гэсэн юм алга.

-Соёолон уралдах гэж байна. Танай уяан дээрээс ямар ямар хурдан хүлгүүд тоосоо өргөх гэж байна вэ?

-Буяагийн маань хээр халзан морь 13-т хурдалсан. Энэ жил их насанд  гэхэд дөрвөн нас сойсон. Морьд маань бүгд 20 дотор хурдалсан. Азарга маань ч мөн адил дээгүүр уралдсан. Өнөөдөр хэдэн сайхан соёолон мордуулна.

А.ТЭМҮР