Морьтны гайхамшгийг “Монгол харцага”-ынхан мэдрүүлнэ

Монгол улсыг БНСУ-ын Чежү аралд 10 гаруй жил “Морьтны гайхамшиг” тоглолтоороо сурталчилсан “Монгол харцага” циркийн уран бүтээлчид ирэх сарын нэгнээс Морьтон харцага жуулчны баазын дэргэдэх асарт тоглолтоо хийхээр болжээ. Тус тоглолтонд уран нугаралт, жонглёр, агаарын даавуу зэрэг циркийн үзүүлбэрээс гадна тэдний нэрийн хуудас болсон морьтны гайхамшиг үзүүлбэрээ толилуулах аж. Морио дээдэлдэг элэг нэгт монгол түмэндээ хүргэх гэж буй тус тоглолт Цонжин болдогийн зүүн ур талд байрлах Морьтон харцага жуулчны баазад нэг цагийн турш өдөр бүр 16:00 цагт үзэгчдийн хүртээл болох аж.