О.Гүндэгмаа шигшээд шалгарч чадсангүй

"Лондон-2012" зуны XXX олимпийн наадмын буудлагын төрөлд эмэгтэйчүүдийн 25 метрийн спорт гар бууны дасгалд өрсөлдөж буй тамирчдын эхний ээлжийн 20 тамирчин хурдан буудлагын төрөлд 30 сумаа буудаж дууслаа.

Өнөөдөр 16.00 цагт эхэлсэн тогтоол буудлагын төрөлд 30 сум буудаж, 284 (93, 95, 96) оноо авснаар 39 тамирчнаас 32 дугаар байрт бичигдээд байсан О.Гүндэгмаа хурдан буудлагын төрөлд 293 (99, 99, 95) оноо авч, урьдчилсан буудлагад нийт 577 оноо цуглууллаа. Эхний ээлжинд буудсан 20 тамирчнаас 577-гоос дээш оноотой 14 тамирчин байгаа тул О.Гүндэгмаа шигшээ наймд шалгарч чадахгүй нь нэгэнт тодорхой боллоо.

Одоо үлдсэн 19 тамирчин хурдан буудлагын төрөлд 30 сум тавьсны дараа урьдчилсан дүн гарах юм. Улмаар шилдэг найман тамирчин шигшээ буудлагад өрсөлдөх эрхтэй болно. Шигшээ буудлага Монголын цагаар 22.30 цагт эхэлнэ.