Чөлөөт бөхийн залуучуудын ДАШТ-нд оролцох багийн нэрс тодорлоо

"Лондон-2012” зуны олимпийн наадмын уур амьсгал тасраагүй байхад ирэх сарын 4-9-ий өдөр  чөлөөт бөхийн залуучуудын ДАШТ Тайланд Улсын Паттая хотод болох гэж байна. Тэмцээнд 1992-1994 онд төрсөн тамирчид оролцох бөгөөд эрэгтэйчүүдийн төрөлд 50, 55, 60, 66, 74, 84, 96, 120 кг-д хүч үзэх бол эмэгтэйчүүдийн төрөлд 44, 48, 51, 55, 59, 63, 67, 72 кг-д барилдана.

Тамирчдыг танилцуулбал эрэгтэй 50 кг-д хүч үзэх Б.Майдар “Гацуурт-Олимп” дээд сургуулийн тамирчин. Тэрбээр Азийн залуучуудын АШТ-ийн хүрэл, залуучуудын улсын хошой аварга болж байсан. 55 кг-д улсаа төлөөлөн оролцох Э.Бэхбаяр ШШГЕГ-ын ”Сүлд” спорт хорооны тамирчин. Азийн өсвөр үеийн АШТ-ий мөнгө, залуучуудын улсын аварга. 60 кг-д “Гацуурт-Олимп” дээд сургуулийн тамирчин Т.Түвшинтулга оролцоно. Азийн өсвөр үеийн АШТ-ийн мөнгө, залуучуудын улсын аварга болж байсан. 66 кг-д “Гацуурт-Олимп” дээд сургуулийн Г.Идэрхүү барилдана. Тэрбээр Азийн өсвөр үеийн болон залуучуудын АШТ-ийн хүрэл, залуучуудын улсын гурван удаагийн аварга болж байсан юм. Залуучуудын улсын аварга болж байсан Сонгинохайрхан дүүргийн “Ирээдүй” цогцолбор сургуулийн сурагч Б.Нямбаяр 74 кг-д хүч үзнэ. 84 кг-д Б.Намхай барилдана. Тэр ”Аварга” биеийн тамирын дээд сургуулийн тамирчин бөгөөд залуучуудын УАШТ-ийн мөнгөн медаль хүртэж байсан. Харин 96 кг-д ЦЕГ-ын “Хүч” спорт хорооны тамирчин Д.Хүдэрбулга барилдахаар болов. Өмнө нь залуучуудын улсын аваргын медаль хүртсэн. 120 кг-д Э.Оюунболд оролцоно. ”Аварга” биеийн тамирын дээд сургуулийн тамирчин бөгөөд залуучуудын УАШТ-ийн хошой аварга.

Эмэгтэй 44 кг-д ХХЕГ-ын “Хилчин” спорт хорооны тамирчин А.Цэндсүрэн оролцоно. Азийн өсвөр үеийн АШТ-ий мөнгө, залуучуудын УАШТ-ий хүрэл медаль хүртэж байсан. 48 кг-д Батлан хамгаалахын их сургуулийн Ц.Бямбазаяа барилдана. Тэрбээр “Азийн хүүхдүүд” спортын наадмын аварга, Азийн өсвөр үеийн АШТ-ий гурван хүрэл, Азийн залуучуудын АШТ-ийн хүрэл, залуучуудын УАШТ-ий гурван алтан медаль хүртсэн амжилттай. ХХЕГ-ын “Хилчин” спорт хорооны тамирчин Э.Даваачимэгийн хувьд 51-кг-д өрсөлдөнө. Азийн залуучуудын АШТ-ий хошой мөнгө, залуучуудын улсын хошой аварга болж байсан юм. 55 кг-д Дархан-Уул аймаг, “Дархан Мега-Старс” клубийн тамирчин  А.Батцэцэг оролцох юм. Өмнө нь өсвөрийн ДАШТ-ийн мөнгө, Азийн өсвөр үеийн аварга, залуучуудын УАШТ-ийн алт, мөнгө, хүрэл медаль хүртэж байв. 59 кг-д Зэвсэгт хүчний “Алдар” спорт хорооны тамирчин С.Цэрэнчимэд оролцоно. Тэрбээр өсвөрийн ДАШТ-ийн болон Азийн өсвөр үеийн АШТ-ийн алт, Азийн залуучуудын АШТ-ийн мөнгө, залуучуудын улсын хошой аварга болж байсан. 63 кг-д Орхон аймгийн харъяат өсвөрийн ДАШТ-ийн болон Азийн өсвөр үеийн АШТ-ийн хүрэл, залуучуудын улсын хошой аварга болж байсан Б.Нямгэрэл оролцоно. 67 кг-д ”Аварга” БТДС-ийн тамирчин О.Оюунтуяа. Тэрбээр Ази тивийн залуучуудын АШТ-ий мөнгө, хүрэл, залуучуудын улсын хошой алтан медаль хүртэж байсан юм. Дашрамд сонордуулахад өнгөрсөн жил Румын улсын Бухарест хотод болсон энэхүү тэмцээнд 59-кг-ын жинд хүч үзсэн Б.Батцэцэг хүрэл медаль хүртэж байсан билээ.

Дасгалжуулагчаар залуучуудын шигшээ багийн дасгалжуулагч Б.Батбаяр, Ц.Баярсайхан, үндэсний шигшээ багийн дасгалжуулагч Б.Баяраа, “Аварга” биеийн тамирын дээд сургуулийн дасгалжуулагч Л.Бадарч, Орхон аймаг, “Ирээдүйн одод” спорт сургуулийн дасгалжуулагч Б.Идэрсайхан,  “Гацуурт-Олимп” сургуулийн дасгалжуулагч, гавьяат тамирчин О.Пүрэвбаатар, “Алдар” спорт хорооны дасгалжуулагч, гавъяат тамирчин Ц.Цогтбаяр,  “Хилчин” спорт хорооны дасгалжуулагч П.Чулуунбаатар нар ажиллана.

Шүүгчээр Олон улсын шүүгч Л.Болормаа, Х.Ганболд нар томилогджээ.  

У.Баярсайхан