Монгол шатарчид 40-р олимпиадад өрсөлдөнө

 Өнөөдөр Монголын шатрын холбоо, Монгол туургатны “Урамтай шатар” холбоо хамтран дасгалжуулагч, ахмад, залуу үеийн шигшээ багийн шатарчдын хамт "Монгол ньюс" мэдээллийн төвд мэдээлэл хийлээ.

Манай улсын шигшээ багийн 10 шатарчин, хоёр дасгалжуулагч, багийн ахлагчийн хамт 14 хүний бүрэлдэхүүнтэй ирэх бямба гаригт Турк улсын Истанбул хотноо болох Дэлхийн шатрын 40-р олимпиадыг зорихоор болжээ. 10 шатарчны эрэгтэй, эмэгтэй төрлөөр тус бүр таван шатарчин өрсөлдөнө.

Дэлхийн 168 орныг нэгтгэсэн Олон улсын шатрын холбоо Дэлхийн шатрын олимпиадыг 1927 оноос зохион явуулж байгаа бөгөөд манай улс 1956 оны 12-р олимпиадад анх оролцож эхэлсэн түүхтэй. Энэ цагаас хойш нийтдээ багаараа 20 удаа амжилт үзүүлсэн байна. Тодруулбал, анх 1960 онд Л.Мягмарсүрэн алтан медаль хүртэж байсан бол сүүлд 2004 онд Б.Хатанбаатар, Т.Батцэцэг нар хүрэл медаль хүртэж байв.

УИХ-ын гишүүн Д.Лүндээжанцан хэлэхдээ “Сүүлийн жилүүдэд шатрын спорт хөгжиж, олон улсын, дэлхийн шинж чанартай тэмцээнүүдээс тогтмол амжилт үзүүлж, чансаагаа дээшлүүлж байгаа билээ. Би сүүлийн таван шатрын олимпиадыг үзсэн. Энэ жил манай шатарчид урьд жилүүдийнхээс илүү бэлтгэлтэй байгаа. Гэхдээ бусад улс орны олимпиадад явж байгаа тамирчдын адил бэлтгэл, сургуулилт, дасгалжуулалт хүрээгүй. Өрсөлдөж буй тамирчдыг харж байхад нэг тамирчин гурван дасгалжуулагчтай явдаг юм билээ. Одоо спорт, аялал жуулчлалын яам байгуулагдсан. Энэ асуудалд анхаарал хандуулах байх гэж найдаж байгаа. Энэ удаа манай багийнхан бор зүрхээрээ мордож байна. Гэхдээ шатарчидаа оюуны хэр гентэй вэ гэдгээ харуулна гэдэгт найдаж байна” гэлээ.

Тэмцээн энэ сарын 27-ноос ирэх сарын 10 хүртэл үргэлжилнэ. Шатрын спорт цаг их шаарддаг тул олимпийн спортын төрөлд багтдаггүй гэдэг. Ийнхүү манай шатарчид 13 хоногийн турш оюун ухааны спортоор дэлхийн 160 гаруй орны шатарчидтай өрсөлдөх юм.

Эрэгтэй шигшээ багийн бүрэлдэхүүнд:

Б.Гүндаваа /ОУ-ын мастер/

Д.Шаравдорж /Их мастер/

Ц.Батчулуун /Их мастер/

Г.Мөнхгал /ОУШХолбооны мастер/

М.Гүнбаяр /ОУШХолбооны мастер/

Эмэгтэй шигшээ багийн бүрэлдэхүүнд:

Б.Мөнгөнтуул /Их мастер/

Т.Батчимэг /Их мастер/

Д.Янжиндулам /ОУ-ын мастер/

Б.Анхчимэг /ОУ-ын мастер/

С.Отгонжаргал /ОУШХолбооны мастер/

Х.Заяа