Өсвөрийн ДАШТ-ээс Б.Нямгэрэл хүрэл медаль хүртлээ

Азербайжаны нийслэл Баку хотын Спорт, урлагийн цогцолборт домогт бөх Х.Алиевийн нэрэмжит чөлөөт бөхийн өсвөр үеийн ДАШТ болж байгаа билээ. Энэ төрөлд манай улсаас таван бөх 38, 43, 49, 56, 65 кг-ийн жинд өрсөлдсөнөөс гурав нь медалийн төлөө барилдсан юм. Тэднээс 65 кг-ийн жинд Б.Нямгэрэл хүч үзэж хүрэл медалийн болзол хангалаа. Өнөөдөр 40 кг-ийн жинд Г.Мөнхцэцэг Оросын бөх Надежда Соколоватай, 46 кг-ийн жинд Г.Отгонжаргал Энэтхэгийн бөх Ринки Ринкитэй, 52 кг-ийн жинд Э.Оюун-Эрдэнэ Казахстаны бөх Мадина Бакбергеноватай, 60 кг-ийн жинд С.Цэрэнчимэд Канадын бөх Бракстон Рей Стонетэй, 70 кг-ийн жинд П.Номин-Эрдэнэ Украйний бөх Анастасия Шустоватай барилдана.

2012 оны чөлөөт бөхийн өсвөр үеийн ДАШТ-ий дүн

Охид

38 кг-д долоон бөх өрсөлдсөн  1. Марина Киуко Дол /АНУ/

                                                2.  Светлана Анкичева /Хазахстан/

                                                3. Према Према /Энэтхэг/

                                                3. Мария Филипова Маринска /Болгар/

43 кг-д 12 бөх өрсөлдсөн         1. Ксения Незговорова /ОХУ/

                                                2.  Туркан Насирова /Азербайжан/

                                                3. Мария Григорьевна /Украин/

                                                3. Ирина Борисова /Хазахстан/

                                                5. Б.Дөлгөөн /Монгол/ 

Манай бөх Б.Дөлгөөн нэгдүгээр тойрогт хийлж хоёрдугаар тойрогт Оросын бөх Ксения Незговороватай таарч 0:7, 1:5 онооны харьцаагаар хожигдож дагах барилдаанд Хазахстаны бөх Ирина Борисоватай хүрэл медалийн төлөөх барилдаанд 0:7, 0:6 онооны харьцаагаар ялагдав.

49 кг-д 13 бөх өрсөлдсөн  1. Ирие Нанами /Япон/

                                        2. Ева Ульрих Сауер /ХБНГУ/

                                        3. Равита Равита /Энэтхэг/

                                        3. Селенай Докгож /Турк/

                                        5. Эрдэнэсүхийн Отгонцэцэг /Монгол/

Манай бөх Э.Отгонцэцэг нэгдүгээр тойрогт Канадын бөх Анне Клайр МкКеег 1:0, 2:2 онооны харьцаагаар хожиж хоёрдугаар тойрогт Японы бөх Ирие Нанамид 0:1, 0:4 онооны харьцаагаар өвдөг шороодож дагах барилдаанд АНУ-ын бөх Каденс Леетэй барилдаж 1:0, 2:0 онооны харьцаагаар ялж Туркийн бөх Селенау Докгожтой хүрэл медалийн төлөө өрсөлдөж 0:6, 0:4 онооны харьцаагаар дийлдэв.  

56 кг-д 13 бөх өрсөлдсөн 1. Аи Курадате /Япон/

                                       2. Каула Коллен Миракл /АНУ/

                                       3. Катержина Мадровска /Польш/

                                       3. Екатерина Мягкова /ОХУ/

Манай бөх Э.Гантуяа нэгдүгээр тойрогт Туркийн бөх Балхан Дерияг 8:4, 5:0 онооны харьцаагаар хожиж хоёрдугаар тойрогт Японы бөх Аи Курадатед 0:1, 0:3 онооны харьцаагаар хожигдож дагах барилдаанд Беларусийн бөх Светлана Ламашевичтэй таарч 0:4, 1:3 онооны харьцаагаар ялагдав.

65 кг-д 13 бөх өрсөлдсөн  1. Масако Фигучи /Япон/

                                        2. Алёна Харченко /Украин/

                                        3. Бүрнээбаатарын Нямгэрэл /Монгол/

                                        3. Ракретта Урбанзаде /Азербайжан /

Б.Нямгэрэлийн хувьд нэгдүгээр тойрогт Японы бөх Масако Фигучитэй таарч 0:1, 1:5 онооны харьцаагаар хожигдож дагах барилдаанд Германы бөх Лиза Манзкег 7:2, 8:0 онооны харьцаагаар, Оросын бөх Татьяна Каширинаг 1:2, 3:0, 4:0 онооны харьцаагаар ялж хүрэл медаль хүртэв.

У.Баяраа