Дэлхийн шатарчид өнөөдөр өрсөлдөнө

Туркийн Стамбул хотноо болох дэлхийн шатрын 40 дүгээр олимпиад өнөөдөр эхэлнэ. Арав хоног үргэлжлэх уг тэмцээнд манай улсаас эрэгтэй, эмэгтэй тус бүр таван тамирчин оролцох билээ. Тэд өчигдөр дасгалжуулагч, албаны хүмүүсийн хамт хүлгийн жолоо залсан юм.  

Эрэгтэй багийн бүрэлдэхүүнд ОУ-ын мастер Б.Гүндаваа, их мастер Д.Шаравдорж, Ц.Батчулуун, ФИДЕ мастер Г.Мөнхгал, М.Гүнбаяр нар багтжээ. Дасгалжуулагчаар гавъяат дасгалжуулагч П.Жигжидсүрэн ажиллана. Эмэгтэй багт их мастер Б.Мөнгөнтуул, Т.Батчимэг, ОУ-ын мастер Д.Янжиндулам, Б.Анхчимэг, ФИДЕ мастер С.Отгонжаргал нар багтсан юм. Эмэгтэй шатарчдын дасгалжуулагчаар МШХ-ны ерөнхий нарийн бичгийн дарга Ц.Батсайхан ажиллах юм. Манай улс тус тэмцээнд 1956 оноос хойш оролцож байгаа бөгөөд 1960 онд гавъяат тамирчин Л.Мягмарсүрэн алт, 1964, 1970 онд ОУ-ын мастер Т.Үйтүмэн алт, мөнгө, 2000, 2002 онд ФИДЕ мастер З.Бямбаа мөнгө, хүрэл, 2004 онд Б.Хатанбаатар, Ц.Батцэцэг нар хүрэл медалиар тус тус энгэрээ гоёж байв. Манай шатарчид Дэлхийн шатрын олимпиадад 20 удаа оролцохдоо 1970 онд 60 орны эрчүүдээс 16-р байр, 1990 онд 64 орны эмэгтэйчүүдээс 12 дугаар байрт шалгарч байсан юм.

У.Баяраа