Н.Түвшинбаяр аварга мянгат малчин боллоо

Анхдагчдын өлгий Булган нутгийн хүү Монгол Улсын Хөдөлмөрийн баатар, гавьяат тамирчин, олимпийн алт, мөнгөн медальт Н.Түвшинбаярын амжилтыг нутгийн зөвлөлийнхөн нь өндрөөр үнэлж саяхан “Аварга” найрыг зохион байгууллаа. Өрмийн цагаан нуурт болсон тус найрт улсын арслан Х.Мөнхбаатар, улсын гарьд Ж.Бат-Эрдэнэ, улсын заан Г.Өсөхбаяр, Д.Баасандорж, Ч.Санжаадамба, Б.Соронзонболд, улсын харцага А.Бямбажав тэргүүтэй улс, аймгийн алдар цолтой 128 бөх барилдаж, их нас, соёолонгийн уралдаан болсон юм. Их насны уралдаанд 105 хүлэг шандсаа сорьсноос Хөвсгөл аймгийн уяач Т.Болдбаатарын морьд түрүү, аман хүзүүдэж торгон жолоогоо өргүүлэв. Харин 79 соёолонгоос мөн л Хөвсгөл аймгийн алдарч уяач Ч.Даваасүрэнгийн бор түрүүллээ. Бөхийн барилдаанд Хөвсгөл аймгийн Тосонцэнгэл сумын харъяат, улсын харцага Ц.Содномдорж түрүүлж, улсын гарьд Ж.Бат-Эрдэнэ үзүүрлэлээ. Наадамчдын сонирхлыг татаж байсан нэг зүйл бол тус нутгийнхныг аваргадаа юу бэлэглэх бол гэсэн бодол байв. Тэгвэл олимпын хос медальтандаа 1000 цагаан хонь бэлэглэж Монгол Улсад дахин нэг мянгат малчин төрүүллээ. Тэд наадмын өмнө аваргадаа 2013 оны “Ланд-200” маркийн машины түлхүүр гардуулсан юм. Түүнчлэн Орхон аймгийн нутгийн зөвлөлөөс 30, тус аймгийн Улаанбаатар хот дахь нутгийн зөвлөлийн дарга, УИХ-ын гишүүн асан Э.Мөнх-Очир 28 сая төгрөг хандивлажээ. Мөн аймгийн Засаг даргын тамгын газраас гаргасан тогтоолын дагуу тамгын газраас 30 сая төгрөг өгсөн бол АН-аас нэр дэвшээд өвдөг шороодсон Д.Түмэнжаргал ч хувиасаа 10 сая төгрөгөөр урамшуулсан байна.

Тэгвэл Увс аймгийнхан дээрх олимпоос хүрэл медаль хүртсэн, гавьяат тамирчин С.Ням-Очирт аймгийнхаа дээд шагнал “Ю.Цэдэнбал” медалиар шагнан, 10 сая төгрөг гардуулсан бол төрсөн сум нь болох Тэсийнхэн хоёр азарга адуутай болгосон. Мөн Тэс сумын уугуул, “ТЭСО” группын захирал О.Сайнбуян 30 сая төгрөгөөр урамшуулсан.

Түүнчлэн олимпийн мөнгөн медальт, гавьяат тамирчин Н.Төгсцогт, хүрэл медальт С.Батцэцэг нарт Архангай аймгийнхан нь тус бүр 10 сая төгрөгөөр байллаа.

У.Баярсайхан