Тэмцээний хоёр дахь өдөр манай бөхчүүд медальд хүрсэнгүй

Эмэгтэй чөлөөт бөхийн насанд хүрэгчдийн ХХIII дахь ДАШТ Канад улсын Альберт мужийн Страткон Канти хотод үргэлжилж байна. Энэ өдөр дэвжээнд 48 кг-д ОУХМ Б.Даваасүрэн, 63 кг-д гавьяат тамирчин О.Насанбурмаа нар гарсан юм. Б.Даваасүрэнгийн хувьд эхний тойрогт ХБНГУ-ын бөх Жаклина Сакиатай таарсан ч ялагдлаа. Түүнийг ялсан бол Японы бөх Ери Тосака, Словакийн бөх Ленка Матежова хоёрын аль хожсонтэй нь барилдах байв. Энэ хэсэгт Азербайжан, Канад, Мексик, Румыний бөх, европийн аварга шалгаруулах тэмцээний таван мөнгөн медальт Эстера Добре оржээ. Нөгөө хэсэг нь АНУ-ын бөх, олимпийн хүрэл медальт, дэлхийн аварга Клариса Чун, Беларусь, Казахстан, Орос, Польш, Украиний бөх, дэлхийн аварга Александра Когут, Хятад, Энэтхэгийн бөхчүүд байлаа. Энэ жинд 16 бөх барилдаж байна.  

Харин О.Насанбурмаагийн хувьд нэгдүгээр тойрогт Яоны бөх Кудо Куакотой таарчээ. Түүнийг ялж чадвал АНУ-ын бөх, ДАШТ-ний мөнгөн медальт Елена Пирожкова, Тайваний Вин Мен Хуа хоёрын аль хожсонтой нь барилдах байсан ч мөн л дийлсэнгүй.  Энэ хэсэгт Азербайжан, Герман, Грек, Орос, Румын, Чехийн бөхчүүд орсон. Нөгөө хэсэгт Беларусь, Болгар, Казахстаны бөх, ДАШТ-ний хошой мөнгө, хүрэл медальт Елена Шалыгина, Канад, Польшийн бөх, ДАШТ-ний хүрэл медальт Моника Ева Михалик, Украиний бөх ДАШТ-ний хүрэл медальт Алла Черкасова, Франц, Энэтхэгийн бөхчүүд хүч үзэж байна. Энэ жинд 19 бөх хурд, хүч, авхаалж, самбаагаа сорьж байна.

Тэмцээний дүнг танилцуулахад:

55 кг 1.Саори Йошида /Япон, олимпийн гурван удаагийн аварга, дэлхийн есөн удаагийн аварга/

2. Хелен Луис Марулис /АНУ/

3. Греета Греета /Энэтхэг/

3. Мария Проволараки /Грек/

11. Батбаатарын Номин-Эрдэнэ /Монгол/

Манай бөх ОУХМ Б.Номин-Эрдэнэ /“Хангарьд” клуб/ нэгдүгээр тойрогт хийлж хоёрдугаар тойрогт канадын бөх Бриттане Моргана Лавердюртэй таарч 1:0, 1:1, 1:3 онооны харьцаагаар дийлджээ. Канадын бөх АНУ-ын бөхөд ялагдсанаар манай бөхөд даган барилдах боломж гарсангүй.

72 кг 1. Анна Франсон /Швед/

2. Гузель Манюрова /Казахстан олимпийн мөнгө, хүрэл, ДАШТ-ний хүрэл медальт /

3. Василиса Марзалюк /Беларусь, ДАШТ-ний хүрэл медальт/

3. Жинг Хью /БНХАУ/

14. Бадрахын Одончимэг /Монгол/

Манай бөх ОУХМ Б.Одончимэг /”Алдар” спорт хороо/ эхний тойрогт Оросын бөх, ДАШТ-ний мөнгөн медальт Екатерина Букинатай сугалаа таарч 0:2, 1:3 онооны харьцаагаар ялагджээ. Оросын бөх Хятадын бөхөд ялагдсанаар манай бөхөд даган барилдах боломж гарсангүй. Энэ жинд 16 бөх өрсөлдөж байна.

У.Баярсайхан