Манай эмэгтэй бөхчүүд өнгөрсөн жилийн амжилтаасаа ухарлаа

Эмэгтэй чөлөөт бөхийн насанд хүрэгчдийн ХХIII дахь ДАШТ Канад улсын Альберт мужийн Страткон Канти хотод болж өнгөрлөө.

Тэмцээний сүүлчийн өдөр манай хоёр бөх тааруу барилдлаа. Тэднээс медалийнхаа өнгийг хувиргах байх хэмээн найдлага тавьж байсан гавьяат тамирчин О.Насанбурмаа медалийн төлөө ч барилдаж чадсангүй.

Өнгөрсөн жил Турк улсын Стамбул хотод болсон ДАШТ-нд манай эмэгтэй бөхчүүд медалийн төлөө барилдаан долоон удаа хийж хоёр мөнгө, нэг хүрэл медаль хүртэж багаараа гуравдугаар байр эзэлж хүрэл цом хүртэж байлаа. Гэтэл энэ жил медалийн төлөө барилдаан хоёр удаа хийж ДАШТ-нд анх удаа оролцсон олон улсын хэмжээний мастер Т.Мөнхтуяа хүрэл медаль хүртэж нэр төрийн нэг медаль авч нүүр тахалж багийн дүнгээр өнгөрсөн жилийн амжилтаасаа ухарлаа. Манай долоон бөхөөс зургаа нь эхний барилдаандаа өвдөг шороодсон. Үүнд дөрвөн бөх гурван үе энэ тэнцүү барилдаж ялагдсан нь байгаа боломжоо дутуу ашиглаж барилдааны тактикаа буруу сонгосныг харуулж байна. Энэхүү ДАШТ нь 48, 67, 72 кг-ийн жингүүдэд шинэ залуу халааг бэлтгэн гаргаж ирэх шаардлагатай байгаа талаар дасгалжуулагч багш нарт сануулга өглөө. 

Ирэх оны есдүгээр сард Унгар улсын нийслэл Будапешт хотод болох ДАШТ нэг мэдэхнээ хаяанд ирчихнэ. Тиймээс түүнээс наана 2013 оны гуравдугаар сарын 2-3-ны өдрүүдэд Улаанбаатар хотод болох эмэгтэй багуудын “Дэлхийн цом”-ын төлөө тэмцээнд оролцох найман баг энэхүү ДАШТ-ээр тодорлоо. Үүнд АНУ, Беларусь, Хятад, Казахстан, Канад, Украин, Японы багууд манай оронд ирж өрсөлдөх болжээ. Мөн оны нэгдүгээр сарын 14-15-ны өдрүүдэд уламжлалт “Mongolian Open-2013” олон улсын тэмцээн болно.

Энэ жилийн ДАШТ-нд 55 кг-ийн жинд түрүүлсэн Японы бөх С.Йошидагаас бусад зургаан жинд шинэ аваргууд төрж АНУ, Беларусь, Канад, Хятад, Швед, Япон зэрэг зургаан орны бөх алтан медаль хүртэж эмэгтэй чөлөөт бөхийн өнгийг тодорхойлдог Азербайжан, ОХУ, Украин, Франц зэрэг орны бөхчүүд медаль авч чадаагүй. Үүгээр эмэгтэй чөлөөт бөхийн төрөл дэлхий даяар эрчимтэй хөгжиж өрсөлдөөн улам ширүүн болсоор байгааг харууллаа.

Зуны олимпийн ХХХ наадмын 16 медальтнаас 55 кг-ийн жинд алтан медаль авсан Японы бөх С.Йошида, 48 кг-ийн жинд хүрэл медаль хүртсэн АНУ-ын бөх К.Чун, 72 кг-ийн жинд хүрэл медаль авсан Казахстаны бөх Г.Манюрова нар ДАШТ-нд зодоглож С.Йошида, Г.Манюрова нар энэ ДАШТ-нд медаль хүртжээ. Зуны олимпийн наадамд оролцсон 76 бөхөөс 12 нь энэ ДАШТ-нд зодоглсноос дээр дурдсан хоёр бөхөөс гадна 48 кг-ийн жинд Беларуссын бөх В.Холодинская алтан медаль, 55 кг-ийн жинд Энэтхэгийн бөх Г.Греета, Грекийн бөх Мария Проволараки нар хүрэл медаль. 63 кг-ийн жинд АНУ-ын бөх Е.Пирожкова алт, 72 кг-ийн жинд Шведийн бөх А.Франсон алт, Беларуссын бөх В.Марзалюк хүрэл медаль хүртжээ.

2012 оны эмэгтэй чөлөөт бөхийн ДАШТ-ний дүн

Энэ ДАШТ-нд Азербайжан, Англи, АНУ, Болгар, Беларусь, БНХАУ, Бразил, Вьетнам, Грек, Израиль, Казахстан, Канад, Латви, Монгол, ОХУ, Польш, Румын, Словак, Сьера-Леоне, Тайвань, Турк, Украин, Франц, ХБНГУ, Чех, Швед, Энэтхэг, Эстони, Япон зэрэг 29 орны 103 бөх өрсөлджээ.

48 кг             

  1. Ванесса Холодинская /Беларусь/

2. Ери Тосака /Япон/

3. Жаклина Сакиа Шеллин /ХБНГУ/

3. Хиаомей Ли /БНХАУ/

10. Баярмагнайгийн Даваасүрэн /Монгол/

Манай бөх ОУХМ Б.Даваасүрэн (“Хангарьд” клуб) эхний тойрогт ХБНГУ-ын бөх Жаклина Сакиа Шеллинд 3:0, 1:3, 2:4 онооны харьцаагаар дийлджээ. ХБНГУ-ын бөх дараагийн тойрогт Японы бөхөд хожигдож манай бөхөд дагах барилдаан хийх боломж гарсангүй. Энэ жинд 16 бөх барилдсан.

51 кг              

1. Анне Мария Жесика Макдональдс Бонди /Канад,  ДАШТ-ийн хүрэл медальт/

2. Янан Сун /БНХАУ/

3. Кумари Бабита /Энэтхэг/

3. Алиса Николе Лампе /АНУ/

9. Даваасүхийн Отгонцэцэг /Монгол/

Манай бөх ОУХМ Д.Отгонцэцэг (“Мега-Старс” клуб) нэгдүгээр тойрогт Польшийн бөх Роксана Марта Засинатай таарч 0:1, 3:0, 0:1 онооны харьцаагаар ялагджээ. Польшийн бөх нь дараагийн тойрогт АНУ-ын Алиса Лампед хожигдсон. Энэ жинд 14 бөх барилдсан юм.

55 кг              

1. Саори Йошида /Япон, олимпийн гурван удаагийн аварга, дэлхийн 9 удаагийн аварга/

2. Хелен Луис Марулис /АНУ/

3. Греета Греета /Энэтхэг/

3. Мария Проволараки /Грек/

11. Батбаатарын Номин-Эрдэнэ /Монгол/

Манай бөх ОУХМ Б.Номин-Эрдэнэ /“Хангарьд” клуб/ нэгдүгээр тойрогт хийлж хоёрдугаар тойрогт канадын бөх Бриттане Моргана Лавердюртэй таарч 1:0, 1:1, 1:3 онооны харьцаагаар дийлдсэн. Канадын бөх АНУ-ын бөхөд ялагдсанаар манай бөхөд дагах барилдааан хийх боломж гарсангүй. Энэ жинд 17 бөх барилдав.

59 кг                          

1. Чжан Лан /БНХАУ, ДАШТ-ний мөнгөн медальт/

2. Залина Сидакова /Беларусь/

3. Тунгалагийн Мөнхтуяа /Монгол/

3. Ольга Буткевич /Англи/

Манай бөх ОУХМ Т.Мөнхтуяа (”Хангарьд” клуб) нэгдүгээр тойрогт Канадын бөх Мишель Фаззаритэй таарч 1:0, 0:1, 3:1 онооны харьцаагаар, хоёрдугаар тойрогт АНУ-ын бөх Лей Жейнсийг 3:0, 0:1, 3:1 онооны харьцаагаарр хожиж мөнгөн медалийн төлөө барилдаанд Беларуссын бөх Залина Сидаковад 0:2, 0:1 онооны харьцаагаар дийлдэж хүрэл медалийн төлөө барилдаанд Энэтхэгийн бөх Шеофан Шилпийг 3:3, 4:2 онооны харьцаагаар ялсан юм. Энэ жинд 13 бөх зодоглов.

63 кг             

1. Елена Сергей Пирожкова /АНУ/

2. Тайбе Мустафа Юсейн /Болгар/

3. Жюстина Анжела Бучард /Канад/

3. Люшюома Хью /БНХАУ/

11. Очирбатын Насанбурмаа /Монгол/

Манай бөх гавьяат тамирчин О.Насанбурмаа (”Хүч” спорт хороо) нэгдүгээр тойрогт Японы бөх Кудо Куакотой таарч 0:1, 4:1, 2:4 онооны харьцаагаар өвдөг шороодсон. Японы бөх дараагийн тойрогт АНУ-ын бөхөд хожигдож манай бөхөд дагах барилдаан хийх боломж гарсангүй. Энэ жинд 19 бөх барилдсан юм.

67 кг              

1. Аделина Мария Грей /АНУ, ДАШТ-ний хүрэл медальт/

2. Дороти Элезабет Йетс /Канад /

3. Йошико Иноуе /Япон, ДАШТ-ний хүрэл медальт/

3. Ян Хонг /БНХАУ/

13. Цэрэндоржийн Баярзаяа /Монгол/

Манай бөх ОУХМ Ц.Баярзаяа (“Мега-Старс” клуб) нэгдүгээр тойрогт Оросын бөх Ирина Богдановатай таарч 0:1, 1:2 ононы харьцаагаар ялагджээ. Энэ жинд 16 бөх барилдсан.

72 кг              

1. Анна Франсон /Швед/

2. Гузель Манюрова /Казахстан олимпийн мөнгө, хүрэл, ДАШТ-ний хүрэл медальт /

3. Василиса Марзалюк /Беларусь, ДАШТ-ний хүрэл медальт/

3. Жинг Хью /БНХАУ/

14. Бадрахын Одончимэг /Монгол/

Манай бөх ОУХМ Б.Одончимэг (”Алдар” спорт хороо) эхний тойрогт Оросын бөх, ДАШТ-ний мөнгөн медальт Екатерина Букинатай сугалаа таарч 0:2, 1:3 онооны харьцаагаар ялагдсан. Оросын бөх хятадын бөхөд ялагдсанаар манай бөхөд даган барилдах боломж гарсангүй. Энэ жинд 16 бөх өрсөлдсөн.

Багийн дүн:

Нэгдүгээр байр         БНХАУ

Хоёрдугаар байр        Япон

Гуравдугаар байр      АНУ

У.Баярсайхан