Б.Номин мөнгө, П.Өнөрбат хүрэл медаль хүртлээ

ОХУ-ын Якут улсын Якутск хотод ЗХУ-ын гавьяат дасгалжуулагч Д.П.Коркиний нэрэмжит V уламжлалт чөлөөт бөхийн “Гран-При” олон улсын тэмцээн энэ сарын 6-7-ны өдрүүдэд болж өндөрлөлөө. Сүүлчийн өдөр 60, 74, 96 кг-ийн жингийн барилдаан болж 74 кг-ийн жинд ОУХМ П.Өнөрбат (”Хасу-Мегаватт” клуб) хүрэл медаль хүртэв. Түүний дараа спортын мастер Б.Номин (”Гацуурт-Олимп” сургууль) нэгдүгээр тойрогт Якутын бөх П.Ясамыг 6:0, 3:1, хоёрдугаар тойрогт АНУ-ын бөх Ререлли Франкийг 1:0, 1:0, гуравдугаар тойрогт Якутын бөх Ф.Владимирийг 3:1, 3:1, дөрөвдүгээр тойрогт Якутын бөх Корякин Александрыг 3:1, 1:0 онооны харьцаагаар ялж мөнгөн медальд бууж алтан медалийн төлөө барилдаанд Беларуссын бөх В.Андреевт 0:3, 0:2 онооны харьцаагаар дийлдэв.

Тэмцээний дүн

55 кг-д           

1. Владислав Андреев /Якут/

2. Батболдын Номин /Монгол/

3. Александр Корякин /Якут/

3. Сюрюн Омак /Тува/

Энэ жинд манай хоёр бөх зодоглосноос спортын мастер Ж.Баярхүү (“Хасу-Мегаватт” клуб) нэгдүгээр тойрогт Якутын бөх В.Петровт 0:6, 0:6 онооны харьцаагаар ялагдав.  Нийт 32 бөх өрсөлдсөн юм.

60 кг-д

1. Александр Богомоев /Буриад/

2. Булат Батоев /Буриад/

3. Сослан Азиев /Хойд Осет/

3. Радослав Великов /Болгар, олимпийн хүрэл медальт, дэлхийн аварга/

ОУХМ Б.Нэмэхбаяр (“Хасу-Мегаватт” клуб) нэгдүгээр тойрогт хийлж хоёрдугаар тойрогт Абхазийн бөх Ампар Рустамд 2:4, 1:3 онооны харьцаагаар ялагдлаа. Энэ жинд 21 бөх өрсөлдөв.

66 кг-д

1. Александр Контоев /Беларусь/

2. Иннокентий Иннокентьев /Киргиз/

3. Айя Анисимов /Якут/

3. Стивен Пами /АНУ/ Тус жинд 32 бөх хүч үзсэн.  

74 кг-д           

1. Зуар Макиев /Хойд Осет/

2. Зураб Наниев /Хойд Осет/

3. Пүрэвжавын Өнөрбат /Монгол/

3. Леонид Спиридинов /Якут/

ОУХМ П.Өнөрбат (”Хасу-Мегаватт” клуб) нэгдүгээр тойрогт Якутын бөх Александ Софроновыг 2:0, 1:0, хоёрдугаар тойрогт Дагестаны бөх Гажи Абдуразаковыг 1:0, 1:0, гуравдугаар тойрогт Гүржийн бөх Георгий Марсагишвилийг 0:1, 1:0, 3:0 онооны харьцаагар дараалан ялж мөнгөн медалийн төлөө барилдаанд Хойд Осетийн бөх Зураб Наниевт 1:3, 0:1 онооны харьцаагаар ялагдаж дагах барилдаанд Туркийн бөх Сердал Каталыг 4:1, 2:0 онооны харьцаагаар ялж хүрэл медаль авлаа. Энэ жинд 20 бөх барилдсан юм.

84 кг-д

1. Семён Семёнов /Казахстан/

2. Максвелл Аскрин /АНУ/

3. Кейт Гэвин /АНУ/

3. Тамерлан Тагзиев /Канад/

ОУХМ М.Мэндсайхан (”Харгант-Цамхаг” клуб) барилдаж нэгдүгээр тойрогт АНУ-ын бөх К.Гэвинтэй таарч оноогоор ялагджээ. Тус жинд 12 бөх өрсөлджээ.

96 кг-д

1. Евгений Коломец /Якут/

2. Лес Зигман /АНУ/

3. Мамука Корзиа /Гүрж/

3. Павел Кривцов /Кемерово муж/

Спортын дэд мастер Ц.Чинзориг (”Харгант-Цамхаг” клуб) нэгдүгээр тойрогт Дагестаны бөх Кулдуев Омарт 0:1, 0:3 онооны харьцаагаар өвдөг шороодов. Энэ жинд 11 бөх өрсөлдсөн юм.

120 кг-д         

1. Георгий Саканделизе /Гүрж/

2. Игорь Дядко /Беларусь/

3. Айял Лазарев /Киргиз/

3. Кирилл Готовцев /Красноярскийн хязгаар/

5. Нацагсүрэнгийн Золбоо /Монгол/

Олон улсын хэмжээний мастер Н.Золбоо (”Хүч” спорт хороо) хоёр удаа оноогоор ялж хүрэл медалийн төлөө барилдаанд Киргизийн бөх А.Лазаревт 0:4, 1:1 онооны харьцаагаар ялагджээ. Мөн спортын мастер Э.Оюунболд (”Аварга” биеийн тамирын дээд сургууль) мөн барилдаж нэгдүгээр тойрогт Гүржийн бөх Георгий Саканделизед хожигдож дагах барилдаанд ялагдлаа. Энэ жинд 14 бөх өрсөлдсөн юм.

У.Баяраа