Мэрил Дэвис, Чарли Уайт нарын хос гурав дахиа түрүүлэв

АНУ-ын Кент хотод уран гулгалтын “Skate America” буюу Гран при тэмцээн энэ сарын 19-21-нд боллоо. Гран при нийт зургаан тэмцээнээс бүрддэг бөгөөд эхний тэмцээн Сэм авгаас гараагаа эхэлсэн бөгөөд эрэгтэй, эмэгтэйчүүдийн ганцаарчилсан болон бүжгийн хос, спортын хосын төрөлд өрсөлдлөө.

Эрэгтэйчүүдийн ганцаарчилсан төрөлд 10 тамирчин өрсөлднөөс Японы эрчүүд бүх медалийг хамав. Өнгөрсөн жилийн ДАШТ-ий мөнгөн медальт, Наран улсын Козүка Такахиро 251.44 оноогоор алтан медаль хүртсэн бол түүний нутаг нэгт залуучуудын дэлхийн аварга Юзүрү Ханю (243.74), Тацүки Мачида (229.95) нар удаалсан юм.

Эмэгтэйчүүдийн ангилалд эзэн орны Эшли Вагнер 188.37 оноогоор өнгөлж, АНУ-ын Кристина Гао 174.25, ОХУ-ын Аделина Сотникова 168.96 оноогоор мөнгө, хүрэл медалийн эзэн боллоо.

АНУ-ад түрүүлэх өндөр магадлалтайд тооцогдож байсан ДАШТ-ий мөнгөн медальт, ОХУ-ын Алина Леонова урьдчилсан болон чөлөөт үзүүлбэртээ алдаа гаргаж, долоодугаар байрт оржээ.

Спортын хосын төрөлд хойд, урд хөршийн Татьяна Волосжар, Максим Транков болон Пан Кин, Тон Жиан нарын хооронд гол өрсөлдөөн өрнөж, ОХУ-ын Волосжар, Транков нарын хослол 195.07 оноогоор өнгөлж, БНХАУ-ын Пан Кин, Тон Жиан (185.07), АНУ-ын Кайдее Денней, Жон Кохлин нар (177.43) удаалав. 

Бүжгийн хосын төрөлд Ванкуверын олимпийн мөнгөн медальт, өнгөрсөн жилийн дэлхийн аварга, эзэн орны Мэрил Дэвис, Чарли Уайт нар (176.28) тасархай түрүүлэв. Тэд аман хүзүүдсэн тамирчдаас даруй 17 балл илүү авсан нь хэрхэн давамгайлсныг төвөггүй илтгэнэ. Мөн тэд “Skate America”-д гурван жил дараалан түрүүлж байгаа нь энэ юм.

Харин мөнгөн медалийг ОХУ-ын Екатерина Боброва, Дмитрий Соловьев (159.95), хүрлийг Канадын Каитлин Уэвер, Эндрью Поже (157.32) нар хүртжээ.

Б.Батаа