Буриадын тамирчин, дасгалжуулагчид манайхантай хамтарна

Соёл, спорт, аялал жуулчлалын дэд сайд М.Түмэнжаргал, тус яамны Биеийн тамир, спортын бодлогын хэрэгжилтийг зохицуулах газрын дарга Д.Жаргалсайхан нарын дөрвөн хүний  бүрэлдэхүүнтэй албаны төлөөлөгчид ОХУ-ын Буриад улсад энэ сарын 18-19-ний өдрүүдэд ажлын айлчлал хийгээд ирлээ.

Монголын төлөөлөгчид  тус улсаас Буриад улсад суугаа Ерөнхий консул Л.Жавзмаа, консул Х.Нархажид нартай уулзаж, хоёр улсын харилцааны асуудал түүний дотор спортын хамтын ажиллагааны талаар ярилцан санал бодлоо солилцов. Тэрбээр шинэ Засгийн газрын анхны төлөөлөгчид Буриад улсад айлчилж байгааг онцлон тэмдэглээд Буриадын талаас зохион байгуулсан уулзалт, үйл ажиллагаанд биечлэн оролцжээ.

ССАЖ-ын дэд сайд М.Түмэнжаргалаар ахлуулсан ажлын хэсэг Буриад улсын Биеийн тамир, спортын агентлагийн дарга В.Бумбошкинтой уулзаж харилцан мэдээлэл солилцон, уламжлалт найрамдлын хамтын ажиллагаагаа өргөжүүлэх, шинэ шатанд гаргах асуудлаар байр сууриа солилцсон байна. Түүнчлэн Монголын төлөөлөгчид Улан-Үдэ хотын спортын барилга байгууламжаар явж, хүүхдийн спортын дунд сургууль, спортын бэлтгэлийн төвөөр орж, шинээр баригдсан Төв цэнгэлдэх хүрээлэн, спортын цогцолбор, цанын спортын баазын үйл ажиллагаатай танилцан, туршлага судласан байна.

Монголын талаас Буриад улсын өвлийн спортын бэлтгэлийн төвд цанын үндэсний шигшээ багийг ОХУ-ын Сочи хотноо болох өвлийн 22-р олимпийн наадамд оролцох бэлтгэлээ хангах санал тавьжээ. Мөн хамтран ажиллах гэрээгээ сунгах, шинээр асуудлууд тусган ажил хэрэг болгохоор тохиролцжээ. Буриад улсын зүгээс чөлөөт, жүдо бөх, байт харваа, бокс гэсэн уламжлалт төрлүүдийн тамирчдаа хамтран бэлтгэх санал гарган тамирчид, дасгалжуулагчдаа солилцохоор болсон.

Буриадын төлөөлөгчид ирэх сард манай оронд харилцан айлчлал хийж хамтран ажиллах гэрээгээ шинэчлэн байгуулахаар болсон байна. Ийнхүү шинээр байгуулагдсан ССАЖЯам анхны гадаад ажлын айлчлалаа хөрш зэргэлдээ Буриад улсаас эхлэн хамтран ажиллах гэрээгээ Улаанбаатар хотноо байгуулахаар тохирсон байна.

У.Баяраа