Цагаан өмсгөлтнүүд Бразилийг зорилоо

Бразиль улсын Салвадор де Бахиа хотод энэ сарын 27-28-нд жүдо бөхийн багийн ДАШТ болно. Тус тэмцээнд дэлхийн шилдэг найман баг өрсөлддөг бөгөөд манай улсын эрэгтэй, эмэгтэй цагаан өмсгөлтнүүдийг Олон Улсын жүдо бөхийн холбоо (IJF) нэр заан оролцуулахаар болсон юм. Багийн ДАШТ-д оролцох Монголын жүдочид  өнгөрсөн шөнө Бразилийг зорилоо. Манай улсаас эрэгтэйчүүдийн 66 кг-ын жинд ОУХМ Д.Төмөрхүлэг, 73 кг-д Г.Одбаяр, 81 кг-д Г.Түвшинжаргал, -90 кг-д Б.Жанчивдорж, +90 кг-д Б.Тэмүүлэн, эмэгтэйчүүдийн 52 кг-д Б.Бат-Эрдэнэ, 57 кг-д Д.Сумьяа, 63 кг-д Ц.Мөнхзаяа, -70 кг-д Ц.Наранжаргал, +70 кг-д П.Лхамдэгд нар Монгол Улсын ардын багш, гавьяат тамирчин О.Балжинням, “Женко” клубийн дасгалжуулагч ОУХМ Ш.Цэвэлмаа нарын удирдлага дор оролцохоор болсон юм. Баг тамирчдыг Монголын жүдо бөхийн холбооны ерөнхий нарийн бичгийн дарга М.Бөхбат ахлахаар болжээ.

Б.Батаа