А.Бямбажав: Монгол туургатны наадамд зодоглоно

Өнгөрсөн жил ОХУ-ын Бүгд Найрамдах Тува улсад Монгол туургатны үндэсний бөхийн дөрөвдүгээр их наадам болсон. Тус наадмын +85 кг-ын жинд Увс аймгийн Сагил сумын харьяат Монгол Улсын залуу харцага А.Бямбажав манлайлсан билээ. Монгол туургатны тавдугаар их наадамд зодоглохоор бэлтгэлээ хийж байхад нь түүнтэй уулзаж ярилцлаа.    

-Удахгүй Монгол туургатны үндэсний бөхийн тавдугаар их наадам болох гэж байна. Та өнгөрсөн жилийн Тувад болсон наадамд түрүүсэн. Тувад болсон наадмынхаа тухай ярихгүй юу?

-Тувад болсон наадам үнэхээр сайхан болсон. Миний хувьд барилдаан бүхэнд хичээж барилдсан. Наадмын зохион байгуулалт, бөхчүүдийг хүлээж авсан байдал гээд л бүх юм сайхан байсан шүү. Наадамдаа маш их сэтгэл гаргаж, ач холбогдол өгч байгаа нь харагдсан.

-Бусад туургатны бөхчүүдтэй барилдахад ямар байсан бэ?

-Ер нь учраа бүр л эвгүй байсан. Бусад туургатны бөхчүүд барьц авбал яаж халах вэ, мэх хийвэл яаж хамгаалах вэ гэх мэтчилэн үндэсний бөхийн  барилдааныг бичлэгээс үзэж ихээхэн судалсан юм шиг санагдсан.

-Та энэ удаагийн наадамд оролцоно биз дээ?

-Тэгэлгүй яахав. Монгол туургатны наадамдаа оролцож, өнгөрсөн наадмын амжилтаа давтахыг хүсч байна. 

-Өнгөрсөн жилийнхээс өмнөх наадмуудад  ямар амжилт гаргаж байв? 

-Би өнгөрсөн жилийн Тувад болсон наадамд анх удаа оролцоод түрүүлсэн. Өмнө нь болсон наадмуудад оролцож байгаагүй. Анх удаа оролцоход үнэхээр сайхан наадам юм байна гэж бодогдсон.

-Таны хувьд монгол туургатны үндэсний бөхийн наадмын юугаараа онцлог гэж боддог вэ?

-Хамгийн гол онцлог нь мэдээж орон орны Монгол туургатны бөхчүүд оролцож байгаа нь. Мөн цолны эрэмбэ гэж байхгүй сугалаагаар явагддаг учраас  нэгийн даваанд ч хүнд учраатай таарах магадлалтай. Энэ нь ер нь бол хүний азыг сорьсон зүйл л дээ. Энэ утгаараа маш сонирхолтой байдаг.

-Эцэст нь та оролцож байгаа Монгол туургатны бөхчүүддээ хандан мэндчилгээ дэвшүүлэхгүй юу?

-Нийт Монгол туургатны бөхчүүддээ наадамдаа сайн оролцоорой, сайн барилдаарай гэж хүсэн ерөөе. Бүгдээрээ наадам дээрээ уулзацгаая.

Б.Батаа