Оюутны спортынхон шилдгүүдээ тодруулав

Монголын оюутны спортын холбооноос жил бүр оны шилдэг тамирчин, дасгалжуулагчийг тодруулдаг уламжлалтай билээ. Тэгвэл Монгол оюутны спортын холбооны VI чуулганы хаалтын үеэр 2012 оны шилдэг оюутан, дасгалжуулагч, орон нутгийн сургуулийг тодруулсан байна.

1993 оноос хойш шилдэг оюутан тамирчинг тасралтгүй тодруулж эхэлсэн. Тэгвэл энэ жил Хүмүүнлэгийн ухааны их сургуулийн оюутан, буудлагын ОУХМ Г.Нандинзаяа, ҮБТДС-ийн оюутан, чөлөөт бөхийн ОУХМ Э.Даваачимэг, дасгалжуулагчаар волейболын ОУХМ Б.Хэрлэн, шилдэг орон нутгийн байгууллагаар Р.Нямцэрэн захиралтай Архангай аймгийн Багшийн сургууль шалгарлаа.

Г.Нандинзаяагийн хувьд энэ онд ОХУ-ын Казань хотод болсон оюутны ДАШТ-д урт бууны ганцаарчилсан болон багийн төрөлд алтан медаль хүртсэн юм. Харин ОУХМ Э.Даваачимэг Финландын Куртане хотод болсон оюутны ДАШТ-ээс мөнгөн медаль хүртсэнээс гадна залуучуудын дэлхийн аварга болжээ.

Б.Батаа