ОУХМ Н.Ганбаатар агсны нэрэмжит тэмцээн болно

Чөлөөт бөхийн ОУХМ, нэрт дасгалжуулагч Н.Ганбаатар агсны нэрэмжит насанд хүрэгчдийн тэмцээн ирэх сарын 8-9-нд Спортын төв ордны “А” зааланд болно.Хоёр дахь удаагаа болох гэж байгаа тэмцээн хөнгөн жингийн 55, 60, 66 кг-ийн ангилалд болох бөгөөд жин бүрт эхний гурван байр 600, 400, 200 мянган төгрөгөөр шагнуулах аж. Түүнчлэн Н.Ганбаатар агсны зодоглож байсан 60 кг-ийн жинд түрүүлсэн бөхийг тусгай шагналаар шагнаж урамшуулах юм.

Н.Ганбаатар нь 1981 оны “Дэлхийн цом”-ын мөнгө, 1979 оны залуучуудын ДАШТ-ий хүрэл медаль хүртэж, олон улсын тэмцээний таван удаагийн аварга болж байснаас гадна чөлөөт бөхийн “Тулгат” клубийг үүсгэн байгуулж байв. Энэхүү клубээс Монгол Улсын гавьяат тамирчин, даян аварга Г.Өсөхбаяр, Монгол Улсын аварга Д.Сумъяабазар, Ази тивийн аварга ОУХМ Т.Зүүнбаян, ОУХМ Б.Батбаяр, С.Боргил нарын манай улсын олон шилдэг бөхчүүд төрөн гарсан юм.

Сонирхуулахад энэ удаагийн тэмцээнийг Н.Ганбаатар агсны шавь нар ивээн тэтгэж явуулахаар болжээ.

Б.Бат