Ч.Сайханбилэгийн гаргасан таван муу шийдвэр

“Шийдэл”-ийн Засгийн газрын тэргүүний  таван сайн шийдвэрийг манай сайт онцолсон.  Тэгвэл түүний  гаргасан таван тааруухан шийдвэрийн  талаар  үргэлжлүүлэн хүргэж байна.

Нэг.Н.Алтанхуягийн 13 болж цөөрүүлсэн яамдыг тоог 15 болгон нэмэгдүүлж тэлэх бодлого явуулсан. Мөн  өмнөх Засгийн үед 16 болгож цөөрүүлсэн сайд нарын тоог 19 болгон нэмэгдүүлж, албан тушаал үйлдвэрлэсэн.  Яам бол мөсөн уулын орой, тиймээс төсвийн хэмнэлт Засгийн газрын бүтэц дээр болохгүй хэмээн УИХ-ын нэгдсэн хуралдаан  дээр ил цагаан мэдэгдсэн. Түүнчлэн Монгол Улсын сайд гэсэн яамгүй орон тоог бий болгов. Гэвч сайдын энэ суудлыг дагалдаж бас нэг ажлын аппарат байгуулах нь бараг тодорхой зүйл. Энэ бүхнээс харвал Засгийн газрын гишүүд лав бүсээ чангалахгүй юм байна.  Гэсэн хэрнээ цомхотгол, хэмнэлтийг доош нь хийнэ гэнэ. Өөрөөр хэлбэл агентлаг, газар гэхчлэн. Эндээс харвал  Ч.Сайханбилэг “Би үхэхээс чи үх” гэсэн зарчмаар төсвөө хэмнэж, өөрөө том “малгай” сонирхож байгаа бололтой.

Хоёр: Засгийн газрын бүтцийг оновчтой болгох нэрийн дор Соёл,спорт, аялал жуулчлалын яамыг үгүй болгох санаандаа бараг хүрчихлээ. Гэсэн хэрнээ нэгтгээд байсан хоёр ч /ЗТБХБЯ, УУЭХЯ/ яамыг эргэн салгаж ихэрлүүллээ. Засгийн газрын хэдэн яамдаас хамгийн бага төсөвтэй /1.6 тэрбум/ энэхүү яамыг татан буулгаснаар үндэсний их өв соёл урьдын адил өөр нэг яамны хавсрага болж, өнгөрсөн жил улсад хоёр тэрбум гаруй төгрөгийн орлого оруулсан аялал жуулчлал эргээд эзэнгүйдэж  байна. Спортыг эрүүл мэндийн салбарт шилжүүлснээрээ өмнөхөө яая гэж байгаа энэ яаманд зүгээр л хачир нэмэхээс цаашгүй болж мэдэх юм. “Шийдэл”-ийн Засгийн газар ийн монгол өв соёл, уран бүтээлчдээр “цангаагаа тайлсан”-ыг зөвтгөх аргагүй мэт.

Гурав:Зөвхөн төсвийн хэмнэлтийн хүрээнд  шийдвэрлэсэн гэсэн тодотголтойгоор Тахарын алба, Цөмийн энергийн газар, Хилийн боомтын албыг татан буулгахаар ямар ч тооцоо судалгаагүй саналыг УИХ-д оруулж ирсэн. Тэгээд эхний хэлэлцүүлэг дээр энэ саналаа эргүүлэн татаж намбагүйтэв. Бушуу туулай борвиндоо гэгч энэ болов бололтой.  Ганцхан жилийн өмнө хэрэгтэй гэж батлуулсан хуулиа эргээд ингэж  цуцлуулахаар санал оруулж ирж байгаа нь Монголын хууль тогтоомж ийм тогтворгүй, итгэхэд бэрх эсвэл “бай”-гаа онодоггүй  гэдгийг ард түмэндээ төдийгүй гадаад ертөнцөд  дахин нэг сануулсан таагүй дохио боллоо.

Дөрөв: Улаанбаатарын утаа гэж домог болтлоо яригдаж байгаа сэдэв бий. Жинхэнэ проблем гэвэл энэ л дээ. Утааны асуудлыг өмнө нь Ерөнхий сайдаар ахлуулсан Агаарын бохирдлыг бууруулах үндэсний хороо  хариуцдаг байсан. Харин шинэ Засгийн газрын хуваарилалтаар агаарын бохирдол эзэнгүйдэж “тэнэмэл” асуудлуудын эгнээнд шилжиж  байна.  Энэ талаархи асуултад Ерөнхий сайд “Агаарын бохирдлыг бүх сайдын хамаарах асуудалд оруулсан” хэмээн хариулж байна билээ. Өөрөөр хэлбэл дунд нь цацаад хаячихсан гэсэн үг.  Улаанбаатарчуудын номер нэг  асуудлыг ийн хариуцах тодорхой эзэнгүй хавтгайд нь хаягласан нь Ерөнхий сайдын муу шийдвэрүүдийн нэг боллоо.

Тав:Засгийн газрын бүтцийн тухай хуулийг УИХ-д оруулж ирэхдээ хуучин Шадар сайдын эрхлэх асуудлын хүрээнд байсан Мэргэжлийн хяналтыг Ерөнхий сайдын мэдлийн хүрээнд авахаар санал оруулж ирсэн. Өөрийнх нь тайбарлаж байгаагаар бол мэргэжлийн хяналтын шинэчлэлийн үр дүнг харах явдал гэж байгаа ч энэ нь олон хүний хардлагыг төрүүлж байж мэднэ. Тэртэй тэргүй Ерөнхий сайдын хамрах хүрээний асуудал олон. Тэр бүгд дээр дахиад нэг агентлаг нэмэгдэхээр наанадаж хүч тарамдах, цалгардах явдал гарах магадлал өснө.  Энэ талаар УИХ-ын гишүүн Ё.Отгонбаяр  “Хийх ажил чинь дандаа хяналт болчихоод байна” хэмээн анхааруулж байсныг эргэн нэг сануулъя. 

П.Булган