“Golia” архийг санаачлагч Дэвид Соломон: Монголчууд архийг ус шиг уудаг

Монгол төрийн сүлд тэмдэгийг ашигласан “Golia” архи монголчуудыг тэр чигээр нь доромжилж орхилоо. Хятадууд хулхи бараа хийхдээ нэг үсгийг нь өөрчилж тавьдаг шиг Монгол гэдэг нэрийг хагасласан энэ архийг Дэвид Соломон гэх америк эр Хойд Америкт импортлодог байна. Монголчуудыг мэдээ ч үгүй байхад хэдийдээ алсын Америкт “дээд зэрэглэлийн” “VIP” статустай болчихсоны учрыг төнхөлөө.

Дэвид Соломон: Монголчууд архийг ус шиг уудаг

DVD-ний автомат машин борлуулдаг энэ эр анх бүтээгдэхүүнээ борлуулах гэж Монголд иржээ. Энд том бизнестэй Хонконг найз нь түүнд монгол архи амсуулж үзсэнээр ийм архийг дэлхийн зах зээлд гаргах хэрэгтэй гэж бодсоноо хэвлэлд ярьжээ. Тэрбээр “Golia” архийг 2013 оны сүүл, 2014 оны эхнээс борлуулж эхэлсэн байх юм. Хэвлэлд өгсөн ярилцлагадаа өөрийгөө ихээхэн дөвийлгөхийн зэрэгцээ монголчуудыг муугаар доромжилсон нь өөрийн эрхгүй бухимдал төрмөөр. Дэвид Соломон “Монгол 3 сая хүнтэй, 20 сая ямаатай. Ямаанууд тоглоом худалдаж авч, кофе ууж, кино түрээслэж авдаггүй биз дээ. Тиймээс надад илүү сайхан санаа төрсөн юм”. “Монголчууд европчуудаас дунджаар 10 дахин  их архи уудаг. Тэд авч чадах хэмжээгээрээ, яг л ус шиг уудаг. Яагаад гэвэл дэлгүүрээр нь дүүрэн архи байдаг бөгөөд бялуу, хөвөн чихэр нь их хэмжээний “муу” архийг нуун далдалж байдаг” гэж ярьжээ.

“Golia” архийг Хүйтний оргилын усаар хийдэг

Албан ёсны сайтад нь “Golia” архийг хийхдээ Монголын хамгийн өндөр цэг болох Хүйтэн оргилын уснаас авдаг хэмээн бахархангуй бичсэнийг харж болно. Мөн Монголын эрс тэс уур амьсгалд тэсвэртэй “өвлийн” цэвэр буудайгаар хийдэг “жинхэнэ” архи гэжээ. “Golia” нь 40 градустай, АНУ-д дээд зэрэглэлийн архинд тооцогдож байгаа бөгөөд өөрийн нэрийн хэд хэдэн коктэйльтэй болсон байна. Худалдаанд гарсан жил гаруйн хугацаанд Москва, Лондон, Бруссел, Сан Францискогийн томоохон тэмцээнүүдээс медаль авч байжээ. Саяхан гэхэд Нью-Иорк хотод болсон “New York World Wine and Sprits” тэмцээнд ялагч болсон аж. Энэ мэтчилэн “Golia” АНУ-д ихээхэн нэр хүндтэй болж, борлуулалт нь аажмаар нэмэгдэж байгаа аж.

Улсын нэрийг хугасласан “Golia” архийг  Монголын ямар компани үйлдвэрлэсэн бэ?

Зөвхөн АНУ-д зарагдаж байгаа энэ архины шилийг Хятадад хийдэг бөгөөд Монголоос импортлодог нь гадна савлагаанаас тодорхой байна. Баян-Өлгийд  байдаг Хүйтэн Оргилын усыг ашигладаг гэж байгаа ч одоогоор Монголын ямар компани, хаана үйлдвэрлээд ноён Соломонд зардаг нь тодорхойгүй. Төрийн сүлд бол Монголын эв нэгдлийн бэлэг тэмдэг. Гэтэл гадны нэг худалдаачин эр архины бизнестээ ашиглаж байгаа нь гутамшигтай. Бид өөрсдөө “Чингис”, “Соёмбо”-ийг архи болгочихоод уусаар байгаа нь энэ эрд жишиг болсон ч юм уу. Ямартаа ч “Golia” архийг гадагш экспортлодог монгол компанийг олж, улсынхаа нэрийг бүтэн болгохыг шаардацгаая. Монголд ямаанаас өөр "зах зээл" байхгүй гэж доромжлох энэ эрээс нэрээ салгаж авцгаая.

Т.Гэрэл